«Մենք էլ էինք ձեզ նման ասում՝ չկա, բայց կանենք․ բերեք էս կենացներից վերանանք»․ Շարմազանով

Այսօր արդեն ընդդիմություն եմ ու պետք է խոսեմ նաև բացասական երևույթներից՝ դրանց լուծում տալու համար։ Այսօր ԱԺ հերթական նիստում հայտարարեց լուծարված խորհրդարանի փոխխոսնակ, ՀՀԿ խոսնակ Էդուարդ Շարմազանովը։

«Ապագա պատմաբաննների խնդիրն է Հայաստանում տեղի ունեցածն անվանել իշխանափոխություն կամ իշխանազավթում, մեր մոտ դա անվանվեց «Թավշյա հեղափոխություն»»,- ասաց Շարմազանովը՝ հավելելով, որ անկախ իր որակումից, դրա պատճառն այն էր, որ մեր ժողովուրդն ուներ չբավարարված սպասումներ՝ տնտեսական, սոցիալական, ու իշխանափոխությունից հետո սպասումներն էլ ավելի շատ են։

«Փաշինյանը շատ բարձր պլանկա էր դրել․ Հայաստանում աղքատներ չեն լինելու, կարմիր գծեր չեն լինելու, իներցիոն բյուջե պետք է լինի և այլն: Հիմա պետք է տեսնենք կատարվածն արդյոք արդարացնո՞ւմ է այդ սպասումները»,- նկատեց Շարմազանովը։

Նա համամիտ չէ, այն տեսակետին, թե բյուջեն իներցիոն է։ Նրա խոսքով՝ իներցիոն էր 2018-ի բյուջեն, նոր կառավարության բյուջեն չի կարող լինել իներցիոն. «2019-ի բյուջեի մասին ասել, թե իներցիոն է, կներեք, բայց դա որևէ քննադատության չի դիմանում։ Չի կարելի ասել, որ սա իներցիոն է, որովհետև սա այն բյուջեն է, որ բերել է նոր կառավարությունը»,-ասաց ՀՀԿ խոսնակը:

Նա նաև նկատեց, որ մարդիկ դուրս են եկել հրապարակ, քանի որ վատ են ապրել։ Շարմազանովը հարց բարձրացրեց. «Ասում էիք, որ բյուջեն կավելացնեք 800 մլն-ով, ո՞ւր ա էդ գումարը, ասում էիք, որ ստվեր կա, բա ո՞ւր ա էդ ստվերը․․․ բա ասում էիք՝ ստվերից կհանենք, փողերը կբերենք։ Ես չեմ ասում՝ եղել ա ստվեր, թե չէ, ես ասում եմ, որ դուք ասում էիք կա, բա ո՞ւր ա, ինչի՞ չի երևում էստեղ»:

Շարմազանովն ասաց, թե իմացել են, որ լինելու է էվոլուցիոն օպտիմալացում։ Նա ծիծաղելով ասաց․ «Դրա անունը դնեք էվոլյուցիոն, թե բնականոն, բայց օպտիմալացում է: էն, ինչ անում է կառավարությունը, հակասում է իր իսկ լիդերի հռչակած սկզբունքին։ Երբ մենք էինք իշխանություն, ասում էինք, թե, այո՛, առանց օպտիմալացման հնարավոր չէ, մեծ թռիչքային տնտեսական աճ հնարավոր չէ, անհնար է 800 մլն-ով ավելացնել բյուջեն, բայց դուք ասում եք՝ չէ, անհնար չի, ու էդ լոզունգով եք եկել իշխանության»,- ընդգծեց Շարմազանովը:

Նա իհարկե համաձայն է, որ պետք է պայքարել կոռուպցիայի դեմ, բայց վստահ է, որ կոռուպցիայի դեմ ասֆալտին փռելով չեն պայքարում։ 

ՀՀԿ խոսնակը նկատեց, որ ՀՀ-ում բոլորի իրավունքները պետք է լինեն հավասար՝ անկախ նրանից Շարմազանովի համախոհներն են, թե Փաշինյանի։ Նա նաև ներքին անվտանգության հարցը բարձրացրեց։ Այդ առումով, Շարմազանովի դիտարկմամբ, դպրոցներում  հայագիտությունը պետք է ունենա կիրառական նշանակություն:

«Ըստ իս՝ դպրոցներում պարտադիր պետք է դասավանդվի Հայ եկեղեցու պատմություն առարկան և նաև պետք է լինի հայագիտության բլոկ, որը պետք է լինի ստրատեգիական, կիրառական հայագիտություն։ Միգուցե մեր իշխանության ժամանակ էլ չի եղել, հիմա կասեք, դե որ պետք էր, թող ձեր իշխանության ժամանակ լիներ, բայց մեր իշխանությունը լավը չի եղել, որ լավը լիներ, ես ձեր տեղը նստած կլինեի, դուք էլ ինձ կքննադատեիք»,-նշեց Շարմազանովը։

Նա նաև հիշեցրեց, որ Արարատ Միրզոյանին դիմել է հարցով, վերջինս ասել է, թե ծրագրում չկա, բայց անպայման կանդրադառնանք։ 

«Մենք էլ էինք ձեզ նման ասում՝ չկա, բայց կանենք․ բերեք էս կենացներից վերանանք»,-եզրափակեց Շարմազանովը։