Քանի դեռ աղբը «ծառ չի բարձրացել»․ խնդիրը չտեսնելով՝ հարց չես լուծի․ ժապավեն կտրելուց անդին․․․

Երևանի հատկապես կենտրոնում աղբարկղերի անհրաժեշտությունը խիստ զգալի է։ 

Դեռ 2021 թ-ին, երբ որոշվեց զոդել բարձրահարկերի աղբամանները, աղբը թափելու խնդիրը գլուխ բարձրացրեց։

Արդարության համար պետք է հիշել, որ երբ տարիներ առաջ, ինչպես քայլիստներն են սիրում ասել, «նախկինների» օրոք քաղաքապետարանը փորձեց աղբատարները փակել, մարդիկ անմիջապես կռիվ սարքեցին։ Հիմա բոլորը փնփնթալով աղբը հասցնում են մի քանի փողոց այն կողմ՝ աղբարկղերին հասնելու համար։

Երբ քայլարածները նոր էին զոդել շենքերի աղբատար խողովակների դռները, դրսում դրվեցին աղբամաններ։ Այդ շրջանում Երևանի սանմաքրման մեքենաներն օրվա մեջ դատարկում էին դրանք։ Հիմա արդեն պատկերը փոխվել է։

Պարզվում է՝ աղբատար մեքենաները «չեն կարողանում» մուտք գործել շենքերի բակեր ու դատարկել աղբամանները․ այստեղ են ասել՝  բա նախկինների ժամանակ ո՞նց էիք կարողանում։

Իհարկե, լավ է, որ աղբն այլևս շենքի մեջ չի կուտակվելու, բնակիչներն ազատվել են գարշահոտությունից, ճանճերից, կարողանում են պատուհան բացել, բայց փոխարենն այժմ էլ աղբը տանն է կուտակվում, քանի որ աղբարկղներն այնքան են հեռացրել շենքերից, որ աղբ թափելու համար հարկավոր է մեկ կամ նույնիսկ երկու փողոց անցնել։

NEWSPRESS.am-ի հետ զրույցում աղբահանման աշխատակիցներից մեկն անկեղծացավ․

«Մեր գործը հեշտացել է․ առաջ մի քանի կետ էինք սպասարկում, հիմա ասում ենք՝ չենք կարում հայաթ մտնենք, ու աղբարկղները տեղափոխում են մի կետ։ Սենց ասեմ՝ 4 հայաթ պետք ա մտնեինք՝ մի փողոցից տանում ենք»,- ասաց մեր զրուցակիցը, ով չցանկացավ հրապարակել իր անունը։

Դիտարկմանը, թե հիմա էլ բնակիչների վիճակն է դժվարացել, քանի որ աղբ թափելու համար բավականին տարածք են հատում, արձագանքեց․ «Հա դե հեռու ա, բայց նենց էլ մենք ենք դժվարանում։ Դե թող 2-3 օրվա հավաքեն՝ միանգամից տանեն թափեն»,-ծիծաղելով ասաց մեր զրուցակիցը։

Ծիծաղը՝ ծիծաղ, բայց խնդիրը մնում է օրակարգային։

Կան տարեց կամ վատառողջ մարդիկ, ովքեր միայն աղբ թափելու համար ստիպված են բավականին տարածություն անցնել աղբով լցված տոպրակներով։

Իհարկե, չենք առարկում, որ շենքում աղբատար խողովակները վաղուց արդեն ոչ թե կոմֆորտի, այլ ինչ-որ տեղ արդեն քաղաքաշինական հետամնացության նշան է, բայց պետք է կարողանալ նաև ճիշտ կառավարել ու կանոնակարգել հարցը, որպեսզի չդժվարացնեն բնակիչների՝ առանց այն էլ հոգսերով լցված առօրյան։

Այս հարցով, իհարկե, պետք է զբաղվի տեղական իշխանությունը, մասնավորապես, քաղաքապետին փոխարինող Տիգրան Ավինյանը։ Սակայն նա շատ լուրջ զբացված է իր նախընտրական քարոզարշավով։

Ավինյանը հազիվ զբաղվում է միայն «մաքուր» գործերով․ օրինակ՝ ժապավեն կտրում, գույնզգույն փուչիկների ֆոնին ֆոտոսեսիաներ անում, նախորդների պայմանավորվածություններով բերված ավտոբուսներն իրեն վերագրում ու փողոցներ անվանափոխում։ Ու թեև նա աղբի խնդիրը չի տեսնում, հարցը դրանից չի լուծվում, աղբը երբեմն հայտնվում է փողոցում կամ «ծառ է բարձրանում»։

Արմինե Մկրտումյան