150 հազար մարդ կազատվի տուգանքներից՝ անկախ ազգությունից

 Նախատեսվում է համաներման կիրառման շրջանակները, վարչական իրավախախտում կատարած անձանց ազատել մինչև 2017թ.-ի դեկտեմբերի 31-ը վարչական իրավախախտումնների վերաբերյալ օրենսգրքի մի շարք հոդվածներով նախատեսված տուգանքը վճարելու պարտականությունից:

Այս մասին ԱԺ արտահերթ նիստի քննարկումների ժամանակ հայտարարեց Արդարադատության նախարար Արտակ Զեյնալյանը՝ նշելով նաև, թե ինչ բացառություններ կլինեն:

Նրա խոսքով՝ ճանապարհային երթևեկության խախտումների տուգանքները չեն ներվի, եթե դրանք կապված են անձանց կողմից հանցագործություն կատարելու այնպիսի ոչ իրավաչափ վարքագծի հետ, ինչն առերևույթ հանցագործության հատկանիշներ է պարունակել և այդ փաստի առթիվ իրականացվել է քրեական վարույթ։ 

Այդ կերպ վարչական պատասխանատվությունից կազատվի շուրջ 150 հազար մարդ: Համաներման գումարը կազմում է 13,7 միլիարդ դրամի չափով գումար:

«Համաներում չի լինի, եթե վարորդը խախտել է հետևյալ կանոնները՝ առանց թույլտվության տրանսպորտային միջոցի վրա կարմիր և կապույտ լուսային ազդանշանով առկայծող փարոսիկներ կամ ձայնային ազդանշաններ արձակող սարքեր տեղադրելը, առանց հաշվառման համարանիշի, կեղծված կամ փոխված համարանիշով մեքենա վարելը, հարբած, ոչ սթափ վիճակում տրանսպորտային միջոցը վարելը, ոստիկանի «կանգառ» ազդանշանին չենթարկվելը, առանց ԱՊՊԱ կտրոնի փակցման երթևեկելը»,- ասաց Արտակ Զեյնալյանը։

Նրա դիտարկմամբ՝ մարդիկ, ովքեր 2012թ.-ից մինչ այժմ չեն վճարել տուգանքները, նրանց հաշիվների նկատմամբ կալանք է կիրառված, չեն կարողանում օգտվել այլ ծառայություններից: Ուստի, համաներումը կբարելավի քաղաքացիների սոցիալ-տնտեսական, բարոյահոգեբանական վիճակը:

Պատասխանելով Հանրապետական խմբակցության պատգամավոր Հայկ Բաբուխանյանի հարցին, թե ինչքանո՞վ է արդար ճանապարհային երթևեկության կանոնների խախտման համար տուգանքներ ստացած անձանց նկատմամբ համաներում կիրառել, երբ մի շարք այլ մարդիկ վճարել են այդ նույն տուգանքները, նախարարն ասաց.

«Սա հավերժ հարց է, որը դուք հնչեցնում եք, սա շատ հին իրավական վեճ է։ Արդյո՞ք համաներում չի կիրառվում հավասարության սկզբունքը։ Տվյալ դեպքում, այն օրենքի նախագիծը, որը ներկայացված է համապատասխանում է համաներման ժամանակակից չափորոշիչներին, որը սահմանել է Եվրոպայի խորհրդի բանաձևը»։

Հարկ է նկատել նաև, որ համաներումը տարածվում է բոլորի վրա՝ անկախ ազգությունից: