3 ֆուտբոլիստներ, ովքեր կարող են փոխարինել Կրիշտիանու Ռոնալդուին

Ռոնալդուն այլևս Մադրիդի «Ռեալի» ֆուտբոլիստ չէ։ Սա ցավալի է, անհավատալի ու շատերի համար նաև անտրամաբանական։ Դեռ նախորդ մրցաշրջանում Արքայական ակումբը մտածում էր Ռոնալդուին փոխարինող գտնելու մասին, սակայն հիմա դա «Ռեալ»-ի առաջ դրված ամենամեծ հարցն է։

NEWSPRESS.am Sport-ը ներկայացնում է 3 ֆուտբոլիստի, ովքեր ամենայն հավանականությամբ կփոխարինեն Ռոնալդուին «Ռեալ»-ում։

Նեյմար

Երբ սայթաքեցին Եգիպտոսի, իսկ հետո նաև Պորտուգալիայի հավաքականները, բոլորը սկսեցին խոսել, որ Ոսկե գնդակը կուղևորվի Բրազիլիա՝ Նեյմարի մոտ, սակայն․․․

Սակայն Բրազիլիան պարտվեց, իսկ Նեյմարը, մեղմ ասած, չտպավորեց։ Բայց դեռ ԱԱ 2018-ից առաջ խոսվում էր Նեյմարի՝ Մադրիդի «Ռեալ» հավանական տրանսֆերի մասին։ Արդեն հիմա իսպանական ակումբի տնօրինությունը մտածում է Նեյմարի մասին, ու շատ հավանական է, որ առաջիկա շաբաթներում այս հարցը լուծվի։ Նախկինում խնդիրը կապված էր Ռոնալդուի հետ, ու շատերը մտածում էին, որ Ռոնալդուն չի հանդուրժի Նեյմարի ներկայությունը, սակայն հիմա ստեղծված են իդեալական պայմանները՝ Նեյմարին դարձնելու Արքայական ակումբի առաջատար։

Կիլիան Մբապե

Լինել 19 տարեկան ու ցուցադրել Աշխարհի առաջնությունում այսպիսի հրաշալի ֆուտբոլ, ոչ բոլորը կարող են։ Այս առաջնությունում Մբապեն վերականգնեց իր հավատն ու աշխարհին ցույց տվեց, որ «ՊՍԺ»-ում անցկացրած դժգույն մրցաշրջանը դեռ չի նշանակում, որ նրա մոտ խաղային անկում կա։ Մբապեն ընդամենը 19 տարեկան է ու այս պահի դրությամբ գտնվում է ֆանտաստիկ մարզավիճակում։ Դեռ մայիս ամսին «Ռեալ»-ը մի պահ ֆիքսվեց Կիլիանի տրանսֆերի վրա, սակայն հետո այդ լուրը մարեց։ Մբապեն էլ իր հերթին ակնարկել էր, որ երկար չի մնա «ՊՍԺ»-ում։ Իսկ Ռոնալդուի բացակայության դեպքում թիմ կանչել Մբապեին, նշանակում է՝ առաջիկա 10 տարում թիմի կազմում ունենալ ֆանտաստիկ խաղացողի։ ԱԱ 2018-ի եզրափակիչը դեռ առջևում է, որից հետո իսպանական ակումբը միանշանակ կակտիվանա ու կմտածի Մբապեի մասին։

Էդեն Ազար

Բրազիլիայի հավաքականի հետ հանդիպման մասին Բելգիայի հավաքականի ֆուտբոլիստ Էդեն Ազարը ցույց տվեց, որ նա մի քանի աստիճան բարձր է կանգնած, քան Նեյմարը։ Թե՛ դրիբլինգով, թե խաղի կազմակերպմամբ ու թե խաղի զարգացման յուրահատուկ մտածելակերպով Ազարը մի քանի անգամ բարձր է Նեյմարից։ Մինչ ԱԱ 2018-ի մեկնարկը, Էդեն Ազարն ակնարկեց «Ռեալ»-ի ղեկավարներին, որ եթե հետաքրքրվեն իրենով, ապա նա կգա։ Ազարի կարիերայում հասունացել է ակումբի փոփոխության հարցը, որը նոր թարմություն կբերի ֆուտբոլիստին։ Իսկ 27-ամյա Ազարը կարող է դառնալ նոր «Ռեալ»-ի նոր առաջատարը ու 3-4 մրցաշրջան իրեն դրսևորել հիանալի։