Աննա Հակոբյան-Արտյոմ Վարդանյան «բարեկամական» հանդիպումը եղել է Աբրահամյանի իմացությա՞մբ

Նիկոլ Փաշինյանի կինը՝ Աննա Հակոբյանը, ֆեյսբուքյան իր էջում օրեր առաջ հրապարակել էր մի լուսանկար ու գրել.

«Հանդիպում «Իմ քայլը» հիմնադրամի լավ բարեկամ, Մոսկվայի և Մերձմոսկովյան հայ համայնքների ղեկավար Արտյոմ Վարդանյանի հետ»...

Սա նույն ինքը՝ Արտյոմ Վարդանյանն է, ով 2012 թվականին Ռուսաստանի Դաշնության մայրաքաղաք Մոսկվայում հիմնել է Kraun Group-ը և զբաղվում է շինարարական նյութերի արտադրությամբ:

Իհարկե ամենևին էլ նորություն չէ, թե ինչպես է Աննա Հակոբյանն իր բուռը հավաքում բոլոր գործարարներին ու ստիպում նրանց բառացիորեն պարել իր դուդուկի տակ, սակայն Արտյոմ Վարդանյանի պարագայում Աննա Հակոբյանի նվագի տակ մտնել-պարելն առնվազն անինքնասիրություն է...

Այս հանդիպմանը գուցե չանդրադառնայինք էլ, եթե դեռ ոչ վաղ անցյալում, իսկ ավելի կոնկրետ, այս տարվա՝ 2021-ի հունվարին, այս նույն գործարարը, ում Հակոբյան Աննան անվանում է ««Իմ քայլը» հիմնադրամի լավ բարեկամ...», Նիկոլ Փաշինյանի դեմ ցույցեր կազմակերպած չլիներ:

Սա այն նույն Արտյոմ Վարդանյանն է, ով հայհոյում էր Նիկոլ Փաշինյանին: Նա հունվարի 11-ին Մոսկվայում ՀՀ դեսպանատան դիմաց կազմակերպված «Թուրք Նիկոլ» ցույցի գլխավոր կազմակերպիչներից էր...

Այս ֆոնին չի բացառվում, որ Վարդանյան-Հակոբյան հանդիպումը՝ ծանրաբեռնված սեղանի շուրջ, մեղանչական բնույթ է կրել: Որոշ տեղեկությունների համաձայն էլ, Վարդանյանը խոստացել է պարբերաբար կլորիկ գումար փոխանցել հիմնադրամին՝ այս կերպ, հավանաբար, քավելով մեղքերը և սիրաշահելով տեր և տիկին Փաշինյաններին:

Թերևս դա է նաև պատճառը, որ Աննա Հակոբյանը ներել ու քնքշանքով է արտահայտվել Վարդանյանի մասին՝ անվանելով նրան «... լավ բարեկամ...»:

Այնպես որ, քանի դեռ «լավ բարեկամ»-ը կա՝ հիմնադրամը դատարկ չի մնա...

Մյուս կողմից էլ, ոչ միայն Աննայի կողմից արդեն ««Իմ քայլը» հիմնադրամի լավ բարեկամ...» տիտղոսին արժանացած Վարդանյան Արտյոմն է ժամանակին «շռայլ» գտնվել Փաշինյանին ուղղված հայհոյանքների մեջ, այլև Ռուսաստանի հայերի միության նախագահ Արա Աբրահամյանը:

Բացի կապիտուլյացիայի փաստաթղթի ստորագման փաստից, Արա Աբրահամյանը չարացած ու վրդովված էր նաև, որ հիմնադրամին ուղղված միլիոնավոր գումարները նպատակին չեն ծառայել: Նա Աննա Հակոբյանին ու Փաշինյանին մեղադրել է հիմնադրամի թալանի մեջ և երբեք չի թաքցրել իր դիրքորոշումը:

Ու շատ հետաքրքիր է՝ Արտյոմ Վարդանյանի և Հակոբյան Աննայի «բարեկամական» հանդիպումը եղել է Աբրահամյանի իմացությա՞մբ, թե՞ առանց դրա՝ Աբրահամյանի մեջքի հետևում...

Ինչևէ... ասում են, նաև, որ Վարդանյանը գործնական առաջխաղացումներ է ակնկալում (շրջանառվում է անգամ դեսպան դառնալու հարցը):

Այդպես է դա, թե ոչ, դեռ պարզ կդառնա, սակայն Աննա Հակոբյանի գրառումն արդեն իսկ խոսուն է. պետք է նկատել, որ Արտյոմ Վարդանյանը Ռուսաստանի հայերի միության նախագահի լիազոր ներկայացուցիչն է Մոսկվայի և Մերձմոսկովյան տարածքում, մինչդեռ Աննա Հակոբյանն իր գրառման մեջ նրան ներկայացրել է Մոսկվայի և Մերձմոսկովյան հայ համայնքների ղեկավար...

Ասել է թե հանդիպումն Արտյոմ Վարդանյանի համար խոստումնալից է և նա կարող է այդպես շատ հեռու գնալ:

Վարդանյանը նույնիսկ մի առիթով իր տված հարցազրույցներից մեկում, անդրադառնալով իր գործունեությանը, մասնավորապես ասել է.

«Ապրելով հորս կողքին` ես միշտ մոտ եմ եղել քաղաքականությանը և ակամա առնչվել դրան: Երկրի զարգացման ճանապարհին գործուն դերակատարում ունենալու համար պետք է ներգրավված լինել նաև քաղաքականության մեջ, ինձ համար դա ինքնանպատակ չէ, այլ խիստ նպատակային»...

Այնպես որ, նրա հանդիպումը ինքնանպատակ չէ, հատկապես որ NEWSPRESS.am-ի որոշ աղբյուրների փոխանցմամբ էլ, Վարդանյանը վաղուց է գաղտնի համագործակցել Աննա Հակոբյանի հետ:

Մեր տեղեկություններով՝ նա «բարեկամի» տիտղոսին արժանանալու համար նաև «շպիոն է աշխատել»: Ինչպես հայտնում են մեզ մեր աղբյուրները՝ Վարդանյանը ՀՀ երկրորդ նախագահ Ռոբերտ Քոչարյանի թիմում եղել է Աննա Հակոբյանի «աչքերն ու ականջները»...