Արամ Մանուկյանը ֆեյսբուքյան սկանդալային գրառումներից հետո արձակուրդ է վերցրել

Երևանի Աջափնյակ վարչական շրջանի ղեկավարի տեղակալ Արամ Մանուկյանն արդեն երկրորդ օրն է, ինչ աշխատանքի չի գնում։ Այս մասին լուրը NEWSPRESS.am-ի հետ զրույցում հաստատեց թաղապետարանի աշխատակազմի քարտուղար Արտյոմ Մեհրաբյանը։

Նա տեղյակ չէր՝ Հայաստանո՞ւմ է արդյոք Արամ Մանուկյանը, թե՞ ոչ, քանի որ, իր իսկ խոսքով, Արամի հետ անձնական շփում չունի, սակայն որպես աշխատակազմի ղեկավար գիտի, որ Արամը 2 շաբաթով արձակուրդ է մեկնել։

Արամ Մանուկյանն արձակուրդի մեկնելու դիմումը գրել է երկուշաբթի օրը՝ ապրիլի 29-ին։ Հարցին՝ զուգադիպությո՞ւն էր արդյոք, թե Արամի արաձակուրդն գնալն անմիջականորեն կապված էր վերջինիս ֆեյսբուքյան գրառումների հետ, Արտյոմ Մեհրաբյանը պատասխանեց․ 

«Թե ինչ է նա գրել իր ֆեյսբուքյան էջում՝ ես տեղյակ չեմ, ես չեմ հետևում նրա էջին, բայց պարոն Մանուկյանն իր հաշվին վերցրել է արձակուրդ և ամսի 29-ից 2 շաբաթով մեկնել արձակուրդի»,- ասաց Արտյոմ Մեհրաբյանը։

Ճշտող հարցին, թե ինչպիսի՞ն են Արամ Մանուկյանի և թաղապետ Գևորգ Բաբայանի հարաբերությունները, Արտյոմ Մեհրաբյանն արձագանքեց, որ ամեն ինչն նորմալ է։

«Թաղապետարանում պարոն Մանուկյանի հետ կապված ոչ մի խնդիր չկա, ոչ էլ թաղապետի հետ կապված խնդիր կա, նորմալ հարաբերություններ են»,- եզրափակեց մեր զրուցակիցը։

Հիշեցնենք, որ ապրիլի 28-ի ուշ երեկոյան նրա ֆեյսբուքյան էջում հայտնվեցին սկանդալային գրառումներ, որոնք հաջորդ՝ ապրիլի 29-ի առավոտյան, արդեն չկային։ Ինչպես հետո պարզ դարձավ, պատահականության սկզբունքով, թե այլ նպատակով, բայց նույն օրն առավոտյան Արամ Մանուկյանը 2 շաբաթով արձակուրդ է վերցրել։