Աղբահանության վիճակը սրվել է․ Ավինյանը խոստովանում է, բայց քայլեր չի անում

Երևանի մի շարք վարչական շրջաններում, այդ թվում` Մալաթիա֊Սեբաստիայում, արդեն մեկ ամիս է՝ աղբահանման աշխատանքները պատշաճ չեն իրականացվում։

NEWSPRESS.am-ին են ահազանգել համայնքի բնակիչները և տրամադրել լուսանկարներ։

Մեզ հետ զրույցում նրանք պնդում են, որ նման վիճակ երբեք չի եղել։ Սակայն մեկ ամիս առաջ աղբն սկսեցին այնքան ուշ-ուշ տանել, որ աղբամանների շուրջը սկսեցին աղբակույտեր հավաքվել ու գարշահոտությամբ լցրել ամբողջ տարածքը։

NEWSPRESS.am-ը բազմիցս անդրադարձել է աղբահանման համակարգի բացթողումներին ու նշել, որ աղբահանության մեքենաներն ու ջրցանները շարքից դուրս են եկել։ 

Հրապարակման մեջ անդրադարձել էինք այն իրողությանը, որ այդ աղբատարների անմխիթար վիճակում հայտնվելու թիվ մեկ մեղավորը նախկին տնօրեն Հովհաննես Մանուկյանն է, ով, մեր տեղեկություններով, շարունակ վատնել է ՊՈԱԿ-ի ֆինանսները։ Հրապարակման մեջ նաև ներկայացրել ենք փաստաթղթեր, թե կոնկրետ ինչ կեղծարարություններ են արել տնօրենն ու նրա «հավատարիմ ենթակաները»։

Ի վերջո, այսօր՝ հուլիսի 17-ին, Երևանի քաղաքապետարանի գործակարգավարական խորհրդակցության ժամանակ, փոխքաղաքապետ Տիգրան Ավինյանը խոստովանել է, որ աղբահանության թերացումները կապված են տեխնիկայի հետ։

Երևանի քաղաքապետի խորհրդական Կամո Արեյանն էլ իր հերթին խոստովանել է, որ որոշ վարչական շրջաններում ու թաղամասերում աղբահանության խնդիրը սրվել է։

Մնում է տեղական իշխանությունը՝ մասնավորապես փոխքաղաքապետ Տիգրան Ավինյանը, ով քաղաքագլուխ դառնալու հետ կապված բավականին լուրջ հեռանկարներ ունի, համարձակություն ունենա ու ոչ միայն հայտարարի, որ տեխնիկայի խնդիր է, այլև ասի, թե ում մեղքով է այդ ամենը, ու պատասխանատվության ենթարկի մեղավորին։

Իհարկե, այս ամենին զուգահեռ նաև հարկավոր է կանոնակարգել հարցը՝ նոր տեխնիկայով համալրել աղբահանման համակարգն ու տնօրեն նշանակել սրտացավ մեկին։

Արմինե Մկրտումյան