Դիանա Գասպարյանը փորձում է համոզել դադարեցնել ակցիան և բացել Էջմիածին մտնող ճանապարհը

Մի խումբ քաղաքացիներ շարունակում են բողոքի ակցիան ընդդեմ գեներալ Մանվել Գրիգորյանի ազատ արձակման։ Նրանք փակել են Էջմիածին տանող ճանապարհը։

«Էս ազիզ օրը բերին հարամին։ Անունը դրել են գրավ ու ազատում են․ նույն կաշառքը չի՞։ Փաստի վրա բռնել են, ուրեմն պետք ա դատեն, իսկ եթե պետք ա մեր բանակի երեխեքին թալանի ու գրավ տա, դուրս գա, թող էդ դատավորը տանի իր տանը պահի»,-ասացին էջմիածինցիները։

Նրանց գնահատմամբ՝ չի կարող զինվորին թալանողը դրսում մնալ, ու պետք է պայքարեն այնքան, մինչև նորից բանտարկեն նրան։

«Ասում են՝ հիվանդ ա, մեռնում ա, լավ էլ չաղացած դուրս ա եկել։ Լրագրողն էլ հարցնում ա՝ ինչպես է Ձեր առողջականը, ասում ա՝ ինձ ինչ ա եղե՞լ որ»,-ասում են էջմիածինցիները։

Նրանք վախենում են նաև Գրիգորյանների հետագա հաշվեհարդարից։ Էջմիածինցիները սխալ են հասկացել նաև քաղաքպետ Դիանա Գասպարյանի գրառումը։ Վերջինս հանդուրժողականության կոչ է արել, սակայն էջմիածինցիները հասկացել են, թե ոգևորում է ցուցարարներին ու ավելի «դուխով» դուրս են եկել նոր ակցիայի։

Դիանա Գասպարյանը, զգալով հասարակության սխալ ընկալումն իր ուղերձին և նաև տեսնելով քաղաքի ելք ու մուտքի խաթարումը՝ որոշել էր ինքն անձամբ գնալ նրանց մոտ և համոզել բացել մուտքը։

«Այսպես, թե այնպես Գրիգորյանը քաղաք չի մտնելու։ Դա մի կողմից, մյուս կողմից էլ գրավը չի նշանակում, թե նա ազատ է, դեռ դատական գործընթաց է լինելու։ Ես հավատացնում եմ ձեզ, որ այսօր այլևս Էջմիածնում Մանվել Գրիգորյանը գործոն չէ, և չի էլ կարող լինել»,-ասաց Գասպարյանը, սակայն ակցիայի մասնակիցները դեռևս չեն զիջում։