Եթե ՀՀ կառավարությունը ոչինչ չձեռնարկի՝ սեպտեմբերի 15-ից հնարավոր է հացը կրկին թանկանա

Վրաստանում սեպտեմբերի 15-ից կարգելվի վերգետնյա տրանսպորտով ցորենի, հացահատիկի ներմուծում, որի հետևանքով տոննայի մեջ հացահատիկը կթանկանա 50 դոլարով:

Այս մասին ԱԺ-ում հայտարարեց «Ելք» խմբակցության պատգամավոր Էդմոն Մարուքյանը:

«Ես խոսել եմ տրանսպորտային ընկերությունների ղեկավարների հետ, նրանք ասում են, որ տոննայի մեջ 50 դոլար կթանկանա, եթե միայն Փոթիով գա հացահատիկը: Այնտեղ մոնոպոլ գործունեության հարց էլ կա: Բնականաբար, դա Վրաստանի ներքին գործն է, բայց եղբայրական պետություններ ենք, Հայաստան-Վրաստան բարեկամական խումբը պետք է զբաղվի այս հարցով»,-ասաց Մարուքյանը:

Նա նկատեց, որ ժամանակը շատ կարճ է և, եթե սեպտեմբերի 15-ին այս որոշումն ուժի մեջ մտնի, Հայաստանը լուրջ խնդիրներ կունենա:

«Առանց այն էլ հացը թանկացել է Ռուսաստանում հացահատիկի թանկացման հիմքով, հիմա էլ կարող է թանկանալ արդեն Վրաստանից վերգետնյա տրանսպորտով հացահատիկի ներմուծումն արգելելու հիմքով»,-ասաց պատգամավորը:

ԱԺ փոխխոսնակ Էդուարդ Շարմազանովը, արձագանքելով նրա հայտարարությանը, նշեց, որ պատրաստվում են այս խնդրով մեկնել Վրաստան:

«Խորհրդարանն իր հնարավորությունների շրջանակում ամեն ինչ կանի, բայց կարծում եմ, որ այստեղ անելիք ունի առաջին հերթին կառավարությունը»,-ընդգծեց Շարմազանովը: