Հրճվելու բան ասացի՞, որ ծիծաղում եք... էդ իմ վրա եք մատ թափ տալի՞ս. դատավորը՝ Քոչարյանի պաշտպանին
Վերաքննիչ դատարանում ընթանում է ՀՀ երկրորդ նախագահ Ռոբերտ Քոչարյանի և մյուսների գործով դատական նիստը: Ավելի վաղ տեղեկացրել էինք, որ նիստը թեժ մթնոլորտում է անցնում:
Դատական նիստին Քոչարյանը չէր մասնակցում, ու նիստերի դահլիճում աղմուկ կար: Գործով դատավոր Արմեն Դանիելյանը, ով արդեն երկու անգամ մերժել է իր ինքնաբացարկի միջնորդությունը՝ ներկայացված Քոչարյանի պաշտպանների կողմից, դիտողություն արեց աղմկողներին:
Սկզբում Քոչարյանի պաշտպաններից Արամ Օրբելյանը փորձում էր ինչ-որ փաստաթղթեր ներկայացնել, բայց դատավոր Դանիելյանը նրան թույլ չէր տալիս արտահայտվել և անընդհատ ընդհատում էր: Նա Օրբելյանից պահանջում էր զբաղեցնել իր տեղը, սակայն փաստաբանը նկատեց, որ այն, ինչ ուզում է ներկայացնել՝ անմիջապես կապված է գործի հետագա ընթացքի հետ:
Այնուհետև Դանիելյանին զայրացրեց մյուս պաշտպանի՝ Հայկ Ալումյանի ծիծաղը:
«Ես ինչ-որ հրճվելու բան ասացի՞, որ ծիծաղում եք, պարո՛ն Ալումյան: Այդ ինչի՞ վրա եք ծիծաղում»,- հարցրեց դատավորը:
Հարցադրումը վերջնականապես հունից հանեց Ալումյանին:
«Հրճվել բառն իմ նկատմամբ չկիրառե՛ք: Ես առաջին անգամ եմ ասում ու մեղմ եմ ասում այս մասին Ձեզ։ Մյուս անգամ այսպես չեմ ասի, մյուս անգամ կոպիտ եմ ասելու»,–ասաց նա՝ ցուցամատը վեր պարզելով:
Դա էլ իր հերթին զայրացրեց դատավորին. «Էդ իմ վրա եք մատ թափ տալի՞ս»,-ասաց դատավորն ու հորդորեց Ալումյանին՝ զբաղեցնել իր տեղը: Այնուհետև Ալումյանը զայրացած նկատեց, որ դատավորն անընդհատ իրենց ընդհատում է և թույլ չի տալիս խոսել, մինչդեռ քննիչի նկատմամբ նույն վերաբերմունքը չի կարող դրսևորել:
Մինչ Ալումյանն իր բողոքն էր ներկայացնում, Արմեն Դանիելյանը նրան իր նստելու տեղն էր ցույց տալիս և ասում, որ իր հետ հավասար չխոսի.
«Երբ Ձեր խոսելու ժամանակը գա՝ ես ձայնի իրավունք կտամ Ձեզ»,-ասաց դատավորը, ինչին Ալումյանն արձագանքեց՝ «Էդ ժամանակը ոնց-որ չի գալիս»...
Տեսնելով, որ այլևս անհնար է նման լարված մթնոլորտում շարունակել դատական նիստը՝ դատարանը 10 րոպե ընդմիջում հայտարարեց:
