Կամ փաստեր բերեք, կամ դատվեք

Երեկ Ազգային անվտանգության ծառայության նախկին տնօրեն Արթուր Վանեցյանը հարցազրույց է տվել ու որոշ մանրամասներ պատմել Կառավարության շենքում տեղի ունեցած գիշերային հանդիպումից ու իրավապահների վզին փաթաթված հրահանգներից:

Սպասելի էր, որ Վանեցյանի հարցազրույցից գիշերը քունը կորցրած Նիկոլ Փաշիինյանը առավոտյան կմտնի հերթական լայվն ու նախկին թալանչիների մասին տեքստերը կկրկնի դեմքի խիստ նյարդային ու հիվանդոտ արտահայտությամբ, որպես սցենարի հաջորդ տարբերակ դիտարկվում էր նրա խոսնակ Մանեի ֆեյսբուքյան գրառումը՝ գրված Փաշինյանի ձեռամբ, բայց այդ սպասումները չարդարացան, որովհետև Վանեցյանի դեմ խոսելու համարձակություն հավաքեց Հրաչյա Հակոբյանը, կամ որ ավելի ճիշտ է ասել՝ թույլ տվեց քրոջ ամուսնուն մտնել իր էջ ու արդեն ձանրաձացնող հռետորաբանությամբ գրառում անել, որովհետև այն, ինչի մասին գրել է Հակոբյանը, որպես օրենսդիր մարմնի ներկայացուցիչ՝ Հրաչյա Հակոբյանն իմանալու ո՛չ իրավասություն, ո՛չ էլ հնարավորություն չուներ:

Ազգային անվտանգության ծառայության ցանկացած ներկա ու նախկին պաշտոնյայի՝ այս կամ այն երկրի կողմից հավաքագրված լինելու կամ գործակալ լինելու մեղադրանքների մասին հնչեցնելու իրավունք չունի որևէ մեկը, եթե ասվածին կից չկան փաստեր, իսկ քանի որ Հրաչյա Հակոբյանի ասածն ընդամենը բամբասանք էր, դա չդիմացավ որևէ քննադատության՝ ու ընկալվեց որպես հիստերիկ նոպաների պոռթկում:

Խնդիրն այստեղ ավելի խորքային է, մի՞թե Փաշինյանի հույսը մնացել են նման էժանագին բամբասանքները, որոնք տարածելու համար այլևս անօգուտ է իր ֆեյսբուքյան էջն ու գործի է դրվել Հրաչիկի ու Մանեի անձնական տիրույթը:

Վտանգավորն այստեղ ոչ թե այդ բամբասանքն է, որն արդեն հերքվել է, այլ այն, որ նման գործելաոճի դեպքում պետական գաղտնիքները կարող են դառնալ քաղաքական առուծախի առարկա, դիվիդենտներ հավաքելու տարբերակ: Եթե մի քանի հոդաբաշխ նախադասություն իրար միացնել չկարողացող դերասան-պատգամավորի մոտ երկրի վարչապետը խոսել է նման լրջության թեմաների մասին, ապա պարզ է, որ երբ իշխանությունը ձեռքից գնա, ինչերի կարող է ընդունակ լինել՝ ներքասղաքական էժանագին տեսարանների համար ազգային անվտանգութան հարցերը կարող են դառնալ շահարկումների առարկա, հայտնվել պրակտիկորեն բոլոր նրանց ձեռքում, որոնք Փաշինյանին կհռչակեն փրկիչ ու Հիսուս:

Սա վկայում է պետական ինստիտուտների խաթարման, պետական համակարգերի փլուզման տանող ճանապարհների առկայության մասին:

Եթե բանը հասել է նրան, որ ազգային, պետական ու անվտանգությանն առնչվող հարցերի շուրջ մեղադրանքներ կարող են հասցվել նախկին պաշտոնյաներին առանց որևէ փաստի, ապա՝ մենք գործ ունենք պետությունը ներսից պայթեցնելու միտումնավոր քայլերի հետ:

NewsPress.am