Օսիպյանը պաշտոնի է վերադարձնում կոռումպացված կադրերին

Ոստիկանության Գեղարքունիքի մարզային վարչության Մարտունու բաժնի պետ Կարեն Սերոբյանը գտնվում է կադրերի ռեզերվում։ NEWSPRESS.am-ի տեղեկություններով՝ ՀՀ նորանշանակ ոստիկանապետ Վալերի Օսիպյանը ցանկանում է այս պաշտոնում նշանակել Մարտունու նախկին ոստիկանապետին՝ Վահան Մարգարյանին։

Իհարկե, կոռուպցիայի դեմ պայքարի և օրինապաշտ երկիր ստեղծելու կոչեր անող նորընտիր վարչապետ Փաշինյանը տեղյակ չէ, թե ով է Վահան Մարգարյանը և ինչու է նա ժամանակին ազատվել ոստիկանապետի պաշտոնից, այլապես թույլ չէր տա վերականգնել նրան իր նախկին պաշտոնում, կամ թեկուզ վերականգնելու փորձեր արվեր։

Մեր տեղեկություններով՝ 2014-ի հուլիսին Մարտունի քաղաքի նախկին ոստիկանապետ, փոխգնդապետ Վահան Մարգարյանն իր մոտ է կանչում Մարտունու շրջանի Վաղարշեն գյուղի բնակիչ Սևադա Հայրապետյանին։ Վերջինս նախկինում աչքի է ընկել թմրանյութերի պատմությունների մեջ և դատապարտվել։

Որպես թմրանյութերի հետ «գործ ունեցածի»՝ ոստիկանապետը Սևադային ներքաշում է գործարքի մեջ։ Իր համար ցուցանիշ ապահովելու նպատակով՝ Վահան Մարգարյանն առաջարկել է կեղծարարության գնալ։ Նա իբր հայտնաբերելու նպատակով, խուզարկություն է ձեռնարկել Սևադայի տանը։ Ոստիկանապետը խոստացել է միայն փաստաթղթերում ցույց տալ, որ Սևադայի տանը պահվել են թմրանյութեր, իսկ հետագայում օգնել նրան խուսափել դատ ու դատաստանից։ Վահան Մարգարյանը խոստացել է նաև փողով օգնել Սևադայի ընտանիքին՝ նրա «ծառայության» դիմաց։

Հարկ է նկատել, որ Սևադային երկար համոզելու հարկ չի եղել, քանի որ լինելով 10 երեխայի հայր՝ նրա ընտանիքը եղել է ծայրահեղ ծանր վիճակում, իսկ ոստիկանապետի առաջարկած տարբերակը պարզապես այդ պահին «օգնություն» է եղել նրան։ Սակայն վերջիններս մի բան չեն հաշվարկել։ Սևադան մինչ այդ դատվածություն է ունեցել, և դատարանը՝ Յուրա Իսկոյանի նախագահությամբ, դատապարտել է Սևադային և ազատազրկել նրան։

Հետագայում ոստիկանապետը հրաժարվել է կատարել նաև իր խոստումները, օգնել ընտանիքին, ինչի պատճառով էլ Սևադան, արդեն բերդում, բարձրաձայնել է ոստիկանապետի կեղծարարության մասին։

2014-ի դեկտեմբերին, նախկին ոստիկանապետ Վլադիմիր Գասպարյանը Վահան Մարգարյանին ազատում է զբաղեցրած պաշտոնից, և նրան դատում են։ 

Մինչև այսօր դատավարությունն ընթացքի մեջ է։ Վերջին դատական նիստը, մեր տեղեկություններով, տեղի է ունենալու հունիսի 5-ին, որտեղ նախատեսվում է արդարացնել Մարգարյանին և նրան նշանակել Մարտունու ոստիկանապետի պաշտոնում։

Դա նրան կարող է հաջողվել, քանի որ ոստիկանապետը գործն, այսպես ասած, ուզում է բարդել իր տեղակալի վրա, այսինքն, իր կատարածի մեղքը գցել նրա վրա։ Թե ինչ է խոստացել նա իր տեղակալին դրա դիմաց, առայժմ մեզ հայտնի չէ, տեղյակ ենք միայն, որ Մարգարյանի կինը Երևանի նախկին ոստիկանապետ Աշոտ Կարապետյանի ազգակցուհին է (երկուսն էլ Լճաշեն գյուղից են), և չի բացառվում, որ վերջինս ևս միջնորդի գործի հաջողության համար։

Այստեղ պատկերն ակնհայտ է՝ Օսիպյանը պարզապես փորձում է վերադարձնել Վլադիմիր Գասպարյանի կողմից ազատված կադրին՝ առանց հաշվի նստելու, թե ինչ գործով է նա այժմ դատական գործընթացների մեջ։

Հարկ է նկատել նաև, որ, մեր տեղեկություններով, նախկին ոստիկանապետ Մարգարյանի պաշտոնավարման ժամանակ, մեկ օրվա մեջ կատարվել է բնակարանային 10 գողություն, որոնք չեն գրանցվել։ Մարտունիում այս մասին խոսում են նաև, որ դրանք կատարվել են ոստիկանապետի հովանավորությամբ։

Այնպես որ՝ վարչապետ Փաշինյանի ուշադրությունն ենք հրավիրում այս միջադեպի վրա և հորդորում, կադրերի ընտրության հարցում լինել աչալուրջ։ Չի բացառվում, որ վարչապետը տեղյակ չէ Մարգարյանի կեղծարարության մասին, սակայն ամենայն հավանականությամբ, Օսիպյանը տեղյակ է՝ ում է բերում պաշտոնի՝ Փաշինյանի հենց քթի տակ։