Պաշտոնանկության ենթակա նախարարների ցանկ. Մաս 2

Առաջին մասն՝ այստեղ

Անդրադառնալով երկրում տեղի ունենալիք առաջիկա փոփոխություններին՝ երեկ գրել էինք, թե որ նախարարներին պետք է անմիջապես հեռացնել զբաղեցրած պաշտոններից:

Երեկ անդրադարձել էինք կառավարության ամենախայտառակ երեք նախարարներին՝ Լևոն Ալթունյանին, Հրանուշ Հակոբյանին և Լևոն Մկրտչյանին:

Այսօր կներկայացնենք հերթական ցանկը՝ հիմնավորելով նրանց պաշտոնանկության հիմնական պատճառներն ու ձախողումները:

Այսպես:

Ֆինանսների նախարար Վարդան Արամյանը րոպե շուտ պետք է հեռանա իր պաշտոնից, ավելին՝ եթե նա չի ցանկանում հեռանալ, նրան պետք է հեռացնեն: Իհարկե, շատ լավ հասկանում ենք, որ Վարդան Արամյանը նախկին դատավոր Արամյանի որդին է և ամուր «մեջք» ունի, սակայն դա չի խանգարում: Բանն այն է, որ Ֆինանսների այս նախարարը հեգնանքով է խոսում աղքատների մասին: Երբ նրան հարցնում են թոշակների կամ աշխատավարձերի բարձրացման մասին, նա սկսում է «լաց լինել»: Ողբալ՝ բառիս բուն իմաստով: Հիմնավորումը՝ «բյուջեում» փող չկա:

Բայց հենց խոսքը պարտք վերցնելու մասին է, Վարդան Արամյանի նմանը չկա: Մեր արտաքին պարտքը շուտով կհասնի 7 միլիարդի, իսկ ՀՆԱ-ի 55 տոկոսն սպասարկում է արտաքին պարտքը: Բյուջեում փող չկա, բայց, ա՛յ, ասենք, նախարարություններում ու պետական մյուս հիմնարկներում ոսկեջրած զուգարանների համար բյուջեն փող ունի, կոնյակի ու ծաղիկների համար փող ունի, շատ ու շատ իրենց հաճույքների համար փող կա, բայց թոշակների համար փող չկա:

Վարդան Արամյանը, լինելով երիտասարդ, այդպես էլ չկարողացավ դիրիժորի փայտիկն իր ձեռքում պահել և մնաց որպես անհաջող կադր: Երկրի ֆինանսական զարգացումն ապահովելու, խնայողական ռեժիմին անցնելու համար Ֆինանսների նախարարին պետք է փոխարինել ավելի խելամիտ այլ կադրով:

Մեր երկրորդ հորիզոնականում Գյուղատնտեսության նախարար Իգնատի Առաքելյանն է: Այստեղ տեղին է հիշել՝ «մինչև չգա հետինը, չի հիշվի առաջինը» արտահայտությունը:

Երկար տարիներ մենք բողոքում էինք Սերգո Կարապետյանի վատ կառավարումից, անգամ անեկդոտ դարձած աղոթքից: Բայց բանից պարզվում է, և այս խոսքերը կհաստատեն բոլոր գյուղատնտեսները, որ Սերգո Կարապետյանն, իր բոլոր թերություններով հանդերձ, դեռ գործ էր անում: Գոնե ինչ-որ բան անում էր: Իգնատի Առաքելյանն այնքան ոչինչ չի անում, որ անգամ մարդ չգիտի՝ ո՛ր թերությունը քննադատի:

Գյուղատնտեսության ողբալի վիճակը նրա անգործության և ոլորտն անտեսելու հետևանքն է: Երբ ոչինչ չես անում, թերությունները չի երևում: Իգնատի Առաքելյանը ոչ մի թերություն չունի, որովհետև մատը մատին չի տալիս:

Նրան պետք է հեռացնել պաշտոնից՝ անգործության և ոլորտն անտեսելու պատճառով: Իգնատի Առաքելյանը, հիշեցնենք, որ Կարեն Կարապետյանի հերթական ձախողված կադրն է:

Մեր ցուցակի 3-րդ հորիզոնականում չէինք կարող չանդրադառնալ Մշակույթի նախարար Արմեն Ամիրյանին: Արդեն տարիներ ի վեր մի խոսք կա: Ասում են` Հայաստանում մշակույթը կզարգանա այն ժամանակ, երբ փակվի Մշակույթի նախարարությունը:

Հասմիկ Պողոսյանի հեռանալուց և Արմեն Ամիրյանի գալուց մեր մեջ թաքուն մի հույս էինք փայփայում, որ Արմեն Ամիրյանը ոլորտը կկարգավորի: Մի թաքուն հույս ունեինք, որ Արմեն Ամիրյանը, լինելով մշակույթի գործիչ, կկարողանա մեր մշակույթը զարգացնել ու մեզ տանել ներկայացումներ դիտելու, համերգներ լսելու... բայց, ավա՜ղ, նախարարի պաշտոնն անիծված է: Ով նստում է չարաբաստիկ այդ աթոռին, դառնում է Հանրապետականի որդի: Ամիրյանն էլ դարձավ Հանրապետական ու շարունակեց չարաբաստիկ կուսակցության չարաբաստիկ գիծը:

Դերասանները հեռացել ու հեռանում են թատրոններից՝ իրենց օրվա հացը վաստակելով կեղտոտ ու ոչինչ չասող սերիալներում նկարահանվելով: Հայաստանում մշակութային արժեք են դարձել հնդկական կինոմատոգրաֆիայի աղբերը: Հայաստանում էլ մեկը մյուսի հետևից աղբ է նկարվում՝ սերիալներ՝ բռնություն ու դաժանություն քարոզող սերիալներ: Արմեն Ամիրայանն այս ամենի դեմ ոչինչ չի անում:

Իր պաշտոնի շրջանակում էլ Մայր թատրոնում բեմադրում են «Հարսնացուն հյուսիսից», մինչդեռ շատ ու շատ դրամատուրգներ իրենց պիեսներով հանդերձ դուրս են մնում մրցակցությունից:

Ոչ միայն Արմեն Ամիրյանը պետք է ազատվի պաշտոնից, այլ նաև Մշակույթի նախարարությունը փակվի առհավետ… Մշակույթը կզարգանա՝ առանց պետությանը խանգարելու, իսկ հիմա մեր կառավարությունը՝ ի դեմ դրածո Ամիրյանի, թիվ մեկ խոչընդոտողն է մշակույթի զարգացմանը:

Շարունակելի…

Արիանա ՀՈՎՍԵՓՅԱՆ

NEWSPRESS.am-ի հիմնադիր-տնօրեն