Եթե ԶԼՄ գրասենյակի վրա հարցում Հայաստանի իշխանությունները շարունակեն լռել, ապա ԵՀՄՖ-ն կդիմի համաշխարհային հայտնի կազմակերպություններին. հայտարարություն

ԵՀՄՖ նախագահությունը հայտարարություն է տարածել Հայաստանում ԶԼՄ-ների ազատության սահմանափակման վերաբերյալ: Հայտարարության մեջ, մասնավորապես, ասված է. 

«ԵՀՄՖ նախագահությունը, ուսումնասիրելով այսօր Հայաստանում ԶԼՄ-ների ազատության հետ կապված խնդիրները, խիստ մտահոգություն է հայտնում կապված ստեղծված իրավիճակի հետ։ Գաղտնիք չէ, որ տասնամյակ ի վեր Հայաստանում իշխել է նախկին նախագահ Սերժ Սարգսյանի փեսա Միքայել Մինասյանի կողմից մոնոպոլիզացված մեդիա դաշտը։ Իշխանափոխությունից հետո թվում էր, որ դաշտը կազատականացվի, սակայն կատարվեց ճիշտ հակառակը․ մի կողմից՝ սոցիալական ցանցերում վխտում են վարչապետի և նրան նվիրված որոշ անհատների կողմից վճարվող ֆեյքերը, որոնք ավելի մեծ թշնամություն են ցուցաբերում մեր երկրի նկատմամբ, քան մեր թշնամի հարևանները, և մյուս կողմից՝ գործում է իշխանամետ մամուլը, հեռուսատեսությունը իր պնակալեզ պալատական գործիչների միջոցով։

Սակայն այն, ինչ կատարվել է խիստ ընդդիմադիր մամուլներից մեկի՝ «Հայելի» ԶԼՄ-ի նկատմամբ՝ վեր է սովորական հանցագործություն լինելուց։ Ըստ փաստերի՝ «Հայելի» ակումբի գրասենյակի վրա հարձակում են իրականացրել իշխանությանը հարող անհատների խումբ, և այդ արարքը դեռևս չի դատապարտվել լրագրող հանդիսացող վարչապետի կողմից։ Երկիրը սևերի և սպիտակների բաժանած, իր քաղաքական ախոյանների նկատմամբ բացառիկ անօրինական ուղիներով, տարական արդարադատության տարրերը խախտող վարչապետը լռում է։

ԵՀՄՖ նախագահությունը հայտարարում է․ եթե այս հարցում Հայաստանի իշխանությունները շարունակեն լռել, ապա ԵՀՄՖ-ն կդիմի համաեվրոպական և համաշխարհային հայտնի կազմակերպություններին, որոնց համար շատ կարևոր է ազատ մամուլի գործունեության զարգացումը բոլոր երկրներում, այդ թվում՝ Հայաստանում՝ պահանջելով մանրակրկիտ ուսումնասիրություններ կատարել հայկական մեդիա դաշտի մոնոպոլիզացիան վերացնելու և սոց․ ցանցերում վխտացող իշխանական ֆեյքերին գնահատական տալու հարցով»։