Ոչինչ չի խանգարում ունենալ կին փոխվարչապետ․ ակնա՞րկ, թե՞ ցանկություն (տեսանյութ)
Ի՞նչն է խանգարում Հայաստանի կառավարությանը, որ կին նախարարներ ու մարզպետներ նշանակի, հատկապես որ նրանք քաղաքականության հետ կապ չեն ունենալու։
Այդ մասին «Քաղաքական կյանքում կանանց մասնակցության օժանդակում» թեմայով քննարկման ժամանակ հայտարարեց ԱԺ «Լուսավոր Հայաստան» կուսակցության պատգամավոր Սրբուհի Գրիգորյանը։
Նրա խոսքով՝ «Լուսավոր Հայաստանն» առաջին կուսակցություններից մեկն էր, որն ակտիվորեն երկրի քաղաքական կյանք տարբեր ոլորտներից կանանց ներգրավեց: Սրբուհի Գրիգորյանն առաջարկում է այս օրինակով ավելացնել կանանց ներգավվածությունը թե՛ ՏԻՄ ընտրություններում, թե՛ կառավարությունում։ Նա առաջարկում է նույնիսկ կին փոխվարչապետ ունենալ։
«Ի՞նչն է խանգարում ունենալ կին փոխվարչապետ, ոչինչ չի խանգարում, դա կարող է անել կառավարությունը»,- ասաց պատգամավորը։
Ունե՞ր այդյոք ենթատեքստ նրա այս հայտարարությունը, թե՞ ոչ, կամ ո՞ւմ նկատի ունի պատգամավորը որպես փոխվարչապետի թեկնածու, այս պահին գուշակություններ չենք անում։ Արձանագրենք միայն, որ օդում կախված լուրերի համաձայն՝ «Լուսավոր Հայաստանը» կառավարության, իսկ մասնավորապես Նիկոլ Փաշինյանի, մեղմ ասած, այն գործիքակազմն է, որի օգնությամբ իշխանությունը բարձրացնում և օրակարգային է դարձնում շատ հարցեր։
Իհարկե, Փաշինյանի համար այդ գործիքակազմը կարող է հանդիսանալ նաև «Իմ քայլը»։ Բայց որոշ դեպքերի համար ԼՀԿ-ն այլընտրանք է՝ շտապօգնություն»․․․ իսկ հատկապես նման նուրբ հարցերում, երբ որպես կին փոխվարչապետի թեկնածու կարող է ակնարկվել նաև վարչապետի կինը՝ Աննա Հակոբյանը, խոսք չի լինի այն մասին, թե իրենք իրենցով «թագուհի» կարգեցին։
Այնպես որ՝ չի բացառվում, որ Սրբուհի Գրիգորյանը պարզապես հարցը գնդակի նման դաշտ նետեց՝ այն խաղարկելու և կարծիքներ հավաքելու համար․․․
Մանրամասները՝ տեսանյութում
