Կեր ու սուս

Արարատի մարզպետ Գարիկ Սարգսյանն, ում ենթագիտակցության մեջ շատ ամուր նստած է, որ պետք է բոլոր հնարավոր և անհնար միջոցներով ծառայել օրվա իշխանությանը, այսօր հերթական խայտառակ ձևակերպումն է արել, այս անգամ սակայն ոչ թե կոկորդիլոսների և նրանց աղեստամոքսային համակարգի, այլ՝ ոստիկանների մասին։

Մարզպետ Սարգսյանը հպարտորեն հայտարարել է, որ ոստիկանությունը ծառայում է օրվա իշխանությանը։ Այդ ցնդաբանությունը հնչեցնելուց հետո, սակայն, կանգ չի առել, և, որպես ի լրումն ասածի, շարունակել է, թե բա ոստիկանությունը միշտ էլ օրվա իշխանության ծառայողն է, ժողովրդի ծառայողն է, և եթե ժողովրդի մեծամասնությունը քվեն տվել է իշխանությանը, այսինքն` ծառայելով իշխանությանը` ծառայում են ժողովրդին:

Բնականաբար, Գարիկ Սարգսյանի այս անտրամաբանական պատասխանը դժվար կլինի վերծանել որևէ գիտակից մարդու համար, դա չեն փորձում անել նաև ոստիկանները, որոնք չգիտեն կոկորդիլոսասեր մարզպետն իրենց նվաստացրեց, թե մեծարեց. համենայնդեպս պաշտոնապես արձագանք դեռ չկա։

Փաստն այն է, որ այս ցնդաբանությունից հետո Գարիկ Սարգսյանին գլխի են գցել նրա մտքի թռիչքի ողջ թշվառությունն, ինչից հետո մարզպետը հարկ է համարել իր ասածը պարզաբանել, թե բա քանի որ իշխանությունն ընտրվել է ժողովրդի մեծամասնության կողմից, ուստի ոստիկանությունը ծառայում է իշխանությանը, ասել կուզեմ՝ ժողովրդին։

Գարիկ Սարգսյանի այսօրվա և՛ հարցազրույցը, և՛ դրա վերաբերյալ տված պարզաբանումը մեկը-մեկից աննյութ են ու մատնում են քայլարած իշխանության դատարկությունը։

Վստահաբար՝ Նիկոլ Փաշինյանը հերթական ներդրումային համաժողովի ավարտից հետո պետք է խմբագրի սեփական թիմին անընդհատ թիկունքից հարվածող մարզպետի խոսքերը, կամ, ինչպես Տրդատ Սարգսյանի պարագայում էր, ասի՝ ցտեսություն, կամ Գարիկ Սարգսյանին պետք է ամեն գնով հեռու պահի բարձրախոսներից ու լրագրողներից, ինչպես արեց Հովիկ Աղազարյանի պարագայում։

NEWSPRESS.am