Աննա Հակոբյանի հավաքած 1 մլն դոլարը, հավաքագրված բյուջեն ու լուծարված ծերանոցը. կոռուպցիան` «թավշյա սկուտեղով»

«Պայծառացնենք մեր տարեցների կյանքը»... դեռ մեկ շաբաթ առաջ, ՀՀ վարչապետի տիկին Աննա Հակոբյանը Ժնևում մասնակցել է վերոգրյալ խորագրով բարեգործական գալլա երեկույթի, որի ողջ հասույթը նախատեսված է  եղել ուղղել Հայաստանի հաշմանդամների ու ծերանոցներում ապրող տարեցների խնդիրների լուծմանը:

Հավաքվել է 1 միլիոն դոլար. Աննա Հակոբյանն այս մասին գրառել է նաև ֆեյսբուքյան իր էջում.

Այս նախաձեռնությունը ողջունեցին ոչ միայն Աննա Հակոբյանի ֆեյսբուքյան էջին հետևող մոլի երկրպագուները, այլև կասկածամիտները, ովքեր  գուցե հոգու խորքում այնքան էլ համոզված չէին, որ հանգանականությունը նպատակին կծառայի:

Իհարկե նրանք կարող էին սխալվել, բայց... եղավ այն, ինչ եղավ: 

Մինչ Աննա Հակոբյանը ծերանոցի տարեցների համար փող էր հավաքում, «անսպասելի և անակնկալ»  ձևով Գյումրիի ծերանոցը լուծարվեց: Ավելի կոնկրետ` լուծարվեց ՊՈԱԿ-ը, իսկ կառույցն ու նրա բնակիչները կմնան այն կազմակերպության հույսին, որը կմասնակցի մրցույթին ու կշահի:

Շրջանառվող լուրերի համաձայն էլ այդ կառույցը Կարմիր Խաչն է: Ասում են` այս ամենն արվում է զուտ այն պատճառով, որ պետությունը չի կարողանում պահել իր տարեցներին և այս օրինակով պետք է լուծարվեն ու այլ կազմակերպությունների խնամքին հանձնվեն նաև մյուս ինտերնատները: Այլ կերպ ասած` պետությունը որոշել է տնտեսել ինտերնատների ծերերի հաշվին:

Սա այն դեպքում, երբ վարչապետ Նիկոլ Փաշինյանն իր վերջին ասուլիսի ժամանակ հայտարարեց, որ պետությունը ֆինանասների խնդիր չունի:

Ու այստեղ երկուսից մեկը` կա'մ Փաշինյանը ստել է, կա'մ պարզապես ուզում է ձեռքերը լվանալ տարեցների խնամքից հետ կապված ծախսերից:

Սա մի կողմից, մյուս կողմից էլ Աննա Հակոբյանը այս ամենին զուգահեռ տարեցների համար հանգանակություն է հավաքում: Այստեղ էլ հարց է առաջանում, եթե տարեցների խնամքով այսուհետ զբաղվելու է բացառապես մրցույթը շահած կազմակերպությունը, այդ դեպքում ո՞ւր են գնալու նույն նպատակով հավաքված գումարները:

Ու այս ամենից հետո էլ դեռ Նիկոլ Փաշինյանն այսօր, հոկտեմբերի 19-ին Գյումրիում կայացած միջոցառմանը հայտարարել է, թե այն գումարները, որոնք քաղաքացիները ՊԵԿ-ի միջոցով վճարում են պետությանը, վճարում են իրենք իրենց, քանի որ այդ գումարով է պետությունը քաղաքացիներին արժանացնում պետական հոգածության. 

«...տարօրինակ կլիներ, եթե ամեն քաղաքացի ինքն իր համար ճանապարհ, դպրոց, պետական ինստիտուներ կառուցեր...»...

Իհարկե կարելի էր գնահատել Փաշինյանի անկեղծությունն ու Աննա Հակոբյանի դրամահավաքությունը, եթե դրանք ազնիվ լինեին. երբ պետական մակարդակով հայտարարվում է, թե գումարի խնդիր չկա ու ամեն ինչ կարգին է, թե պետեկամուտների օգնությամբ բյուջեն հավաքգրվել է,  ու դրան զուգահեռ էլ Աննա Հակոբյանն է հանգանակություն հավաքում, կոնկրետ դեպքում ծերերի խնամքի համար, ու երբ այդ ամենից հետո դարձյալ պետական մակարդակով որոշում է կայացվում ինտերնատը` ՊՈԱԿ-ը, լուծարել, որովհետև միջոցներ չկան, ստիպված ես լինում կասկածել` արդյոք նպատակներն ի սկզբանե ազնի՞վ են եղել:

Այնպիսի տպավորություն է, որ «հեղափոխության» արդյունքում պարզապես մեկ ուրիշ հետույք է հայտնվել «հրահանգչի» աթոռին, ու այսօր ո'չ թե ընթանում է կոռուպցիայի դեմ պայքար, այլ կոռուպցիան օրինականացվում է: Պարզապես, ի տարբերություն նախորդների, նորերն այս ամենը ժողովրդին հրամցնում են «թավշյա սկուտեղով»...

Արմինե Մկրտումյան