«Այո, շատ հանրային կառույցներ ու ճանապարհներ կտուժեն՝ կարևորը Սևանը բարձրանա»․ Վարազդատ Կարապետյան (տեսանյութ)

Ազգային ժողովում «Իմ քայլը» խմբակցության պատգամավոր Վարազդատ Կարապետյանը ներկայացրել է նախագիծ, որով առաջարկում է փոփոխություններ և լրացումներ կատարել «Սևանա լճի էկոհամակարգի վերականգնման, պահպանման, վերարտադրման, բնականոն զարգացման և օգտագործման միջոցառումների 2020 թվականի տարեկան ծրագրին հավանություն տալու մասին» օրենքում։

Կարապետյանն առաջարկում է բարձրացնել Սևանա լճի մակարդակը և միևնույն ժամանակ ընդգծում, որ կառավարության առաջ պետք է կոշտ սահմանափակում դնել, որպեսզի գործադիրը հույս չդնի Սևանի վրա։

«Մենք պետք է հասնենք մոտավորապես տարեկան 20 սմ լճի մակարդակի բարձրացման` 20-ից 30 սմ։ Եվ դրանք այն թվերն են, որ մեզ հնարավորություն կտան 2030 թվականին սահմանված թիրախին հասնել՝ 1903,5 մետր»,- ասաց Կարապետյանը։

Նա չբացառեց, որ Սևանի ափամերձ տարածքները հնարավոր են տուժեն ջրի բարձրացումից։

«Ակնհայտ է, որ ճանապարհների որոշ հատվածներ կջրածածկվեն։ Օրինակ՝ Մարտունի-Վարդենիս ճանապարահատվածից որոշ տարածք առաջիկա 5 տարում կջրածածկվի»,-ասաց պատգամավորը՝ նշելով, որ արդեն հիմա պետք է քայլեր ձեռնարկել՝ առաջիկայում խնդիրներ չունենալու համար։

«Այո՛, շատ հանրային կառույցներ կտուժեն Սևանի բարձրացումից, բայց կարևորը Սևանի բարձրացումն է»,- ասաց նա։

Մանրամասները՝ տեսանյութում