Դուք չէի՞ք, որ ասում էիք՝ ոչ մի հիվանդ չի տուժելու փողի պատճառով, բա սա ի՞նչ է․ մահամերձ կնոջ տղան դիմում է Փաշինյանին (տեսանյութեր)

Փող ունես՝ առողջ ես, փող չունես՝ գնա մեռի։ Այս մասին այսօր կառավարություն դիմաց հայտարարեց քաղաքացի Գարիկ Բաղդասարյանը, ում կարծիքով այդպես էլ չունեցանք մեր երազած Հայաստանը։

Նա իր քրոջ և մորաքրոջ հետ եկել էր կառավարություն իր մոր խնդրով։ Գարիկ Բաղդասարյանի մայրը 56 տարեկան է, նա սրտի հետ կապված խնդիրներ ունի։ Ու երբ կնոջը ծանր վիճակով տեղափոխել են հիվանդանոց, ոչ մի տեղ նրան չեն ընդունել։

Բաղդասարյանի մորաքույրը NEWSPRESS.am-ի հետ զրուցյում պատմեց, թե ինչպես 2 օր առաջ տեղափոխել են «Նորք Մարաշ» բժշկական կենտրոն։ Կնոջ ներկայացմամբ՝ թեև տեսել են, որ քրոջ վիճակը վատ է, սակայն նրան չեն ընդունել։

«Երևի տեսնում են՝ խեղճ ու կրակ տղա է, փող չունի, որ վճարի՝ չեն ընդունում»,- մեզ հետ զրույցում ասաց կինը՝ հավելելով, որ քույրը սրտի վիրահատության կարիք ունի, սակայն նրան չեն վիրահատում։

Արդեն 3 օր է՝ կինը գտնվում է «Սուրբ Գրիգոր Լուսավորիչ» բժշկական կենտրոնում։

Գարիկ Բաղդասարյանն էլ NEWSPRESS.am-ի զրույցում նշեց, որ ինքը դոնոր է հանդիսանում և 3 ամիսը մեկ՝ արյուն է տալիս։ Մոր խնդրով դիմել է բոլոր ՀԿ-ներին, կառավարությանն ու առողջապահության նախարար Արսեն Թորոսյանին, սակայն ոչ ոք չի օգնել։

Ու քանի որ Թորոսյանը դեռ այս տարվա հունվարին հայտարարել էր, որ Հայաստանում իշեմիկ ինսուլտի վիրահատությունները կկատարվեն անվճար՝ պետպատվերի շրջանակում, ուստի Գարիկ Բաղդասարյանը հերթագրել է մորը, սակայն հետո պարզվել է, որ անվճար վիրահատություն չեն անում։

Կառավարության դիմաց էլ Գարիկ Բաղդասարյանը կոչով դիմեց վարչապետ Նիկոլ Փաշինյանին՝ նշելով, որ մայրը հիվանդ է ու ամեն պահի հնարավոր է մահանա, սակայն հիվանդանոցում ասում են, թե փող բերեք, հետո կվիրահատենք։

«Դուք չէի՞ք, որ ասում էիք ոչ մի հիվանդ չի տուժելու փող չունենալու պատճառով, վերջ անարդարությանն ու կոռուպցիային, բա սա ի՞նչ է։ Մայրս մահամերձ պառկած է ու հիվանդանոցի տնօրեններն ասում են գնա փող բեր, վիրահատեմ»։

Մանրամասները՝ տեսանյութում