Արսեն Բաբայանի տեսակցությունների արգելանքն իրավաչափ չէ. կբողոքարկեն մինչև Եվրոպական դատարան. փաստաբան

ԱԺ աշխատակազմի ղեկավարի նախկին տեղակալ Արսեն Բաբայանի փաստաբան Երվանդ Վարոսյանն այսօր տեսակցել է իր պաշտպանյալի հետ։ Այս մասին նա հայտնեց NEWSPRESS.am-ի հետ զրույցում: Երվանդ Վարոսյանի փոխանցմամբ՝ Արսեն Բաբայանը մարտական է տրամադրված:

«Զգացողությունը նորմալ է, ինքն էլ մարտական է տրամադրված»,-ասաց Երվանդ Վարոսյանը:

Ինչ վերաբերում է Արսեն Բաբայանի տեսակցությունների վրա դրված արգելանքին, ապա, փաստաբանի որակմամբ, այն իրավաչափ չէ: 

«Առհասարակ մեր օրենսդրությամբ տեսակցությունների արգելանքը իրավաչափ չէ, քանի որ անգամ օրենքով չի սահմանում, թե որ հիմքերի առկայության դեպքում և ինչ մեխանիզմով պետք է արգելանք դրվի. բայց, ամեն պարագայում, Արսեն Բաբայանի նկատմամբ այդ արգելանքը չի կարող ունենալ որևէ տրամաբանություն: Դա ինձ ստիպում է կարծել, որ սա նրա դեմ սանձազերծված հետապնդումների մի օղակ է»,- ասաց փաստաբանը:

Ու չնայած նրան, որ տեսակցության սահմանափակումն անհիմն է, ամեն դեպքում, Երվանդ Վարոսյանի խոսքով, այնքան էլ անսպասելի չէր: Քանի որ, ըստ նրա, երբ որևէ հանցավոր արարք չկատարած անձը գտնվում է ազատազրկման մեջ` արդեն նման սահմանափակումները սովորական են դառնում և կանխատեսելի:

Ամեն դեպքում, փաստաբանը չի կարող ասել, թե դեռ ինչ «անակնկալներ» կարող են լինել:

«Այսօրվա Հայաստանում անսպասելի ոչինչ չկա: Ամեն ինչ կարելի է սպասել»,- ասաց նա:

Խոսելով հետագա քայլերի մասին՝ Վարոսյանը նշեց, որ պատրաստվում են, օրենքով սահմանված կարգով, խնդիրը բարձրացնել բոլոր ատյաններում: Նրա խոսքով՝ անկախ ընթացքից, բոլոր հիմքերը կան նաև Եվրոպական դատարան գանգատ ներկայացնելու համար և, ներպետական ատյանները սպառելուց հետո, բնականաբար, կներկայացնեն:

«Այստեղ հարցը լուծվելու է քաղաքական մակարդակում, ինչպես որ քաղաքական մակարդակում սկսվել է հետապնդումը, և, ցավոք սրտի, ինչպես հայտնվել է անազատության մեջ, այնպես էլ քաղաքական որոշմամբ հայտնվելու է ազատության մեջ, բայց անկախ ամեն ինչից այս հարցը իրավական գնահատական պետք է ստանա Եվրոպական դատարանում»,- եզրափակեց Վարոսյանը: