Արսեն Բաբայանը վտանգավոր հանցագո՞րծ է. ՀՔԾ պետը պատասխանել է լրագրողների հարցերին

Յուրաքանչյուր կոնկրետ գործում քննիչն է գնահատում, թե որ խափանման միջոցն է ի զորու ապահովել մեղադրյալի պատշաճ վարքագիծը: Այս մասին այսօր լրագրողների հետ զրույցում ասաց ՀՔԾ պետ Սասուն Խաչատրյանը՝ անդրադառնալով Արսեն Բաբայանի նկատմամբ ընտրված խափանման միջոց կալանքին:  

«Տվյալ դեպքում գործը քննող քննիչը եկել է այն եզրահանգման, որ Արսեն Բաբայանի պատշաճ վարքագիծը կարող է ապահովել միայն կալանավորման պայմաններում և նաև հենց այդ նկատառումներով արգելանք է դրվել նրա տեսակցությունների վրա»,- նշեց նա՝ հավելելով, որ յուրաքանչյուր գործ իրավական տեսանկյունից յուրահատուկ է և պետք չէ զուգահեռներ տանել մեկը մյուսի հետ: 

Արման Բաբաջանյանին՝ Նաիրի Հունանյանին տեսակցել թույլ տալու և պատգամավորներ Անի Սամսոնյանին և Գևորգ Գորգիսյանին տեսակցությունն Արսեն Բաբայանին արգելելու դեպքերը Խաչատրյանը հորդորեց չնույնացնել, քանի որ մի դեպքում Հունանյանն արդեն իսկ պատիժը կրող անձ է, իսկ Բաբայանի նկատմամբ խափանման միջոց է ընտրված: 

«Արսեն Բաբայանի նկատմամբ խափանման միջոց ընտրված է կալանք: Խափանման միջոց կալանք ընտրվում է այն նկատառումներով, որպեսզի բացառվի նրա շփումն այլ անձանց հետ»,- ասաց ՀՔԾ պետը:

Լրագրողի հարցին, թե՝ փաստորեն Արսեն Բաբայանը վտանգավոր հանցագո՞րծ է, Խաչատրյանն ասաց, որ դրանք հարցեր են, որոնք պատասխաններ չունեն: 

«Հանրության համար հանցանքի վտանգավորությունը, ծանրության աստիճանն ինչ- որ չափով կանխորոշում է, որոշակի դեր խաղում է խափանման միջոց ընտրվելու հարցում, բայց խափանման միջոց ընտրելու հարցում հիմքը մեղադրյալի պատշաճ վաքագիծն ապահովելն է»,- ասաց նա:

Ինչ վերաբերում է հարցին, թե ինչո՞վ է խախտվելու Բաբայանի պատշաճ վարքագիծը, եթե նա հանդիպի անչափահաս երեխաների հետ, ապա նա ասաց, որ նման տեղեկատվություն չունի, իսկ եթե նման բան եղել է, ապա դա, ըստ նրա «թյուրիմացություն է»: