Ֆեյսբուքյան էջս փակեցիք` մտածում եք կլռե՞մ. ինչքան ճղճիմ եք

Այն, որ ադրբեջանցի և թուրք հաքերները հաճախ կոտրում են հայ օգտատերերի ֆեյսբուքի էջերը, դա ինչ-որ տեղ կարելի է հասկանալ. դե հակառակորդ են, թշնամի: Բայց երբ հայ օգատերերն են իրենց ազգակիցներին թշնամություն անում` անընդունելի է:

Կարճ կապեմ` ֆեյսբուքի էջս կոտրել են... իհարկե եփած հավի համար էլ պարզ է, թե որ կողմից է փչում քամին, և ում կարող էին դուր չգալ իմ ֆեյսբուքյան գրառումներն ու լայվերը` անուններ չեմ տալիս։

Պարզապես չեմ կարող չասել, որ էջս կոտրող մանրոգի արարածներն այս ճղճիմ պահվածքով հերթական անգամ ապացուցում են, թե որքան գաղջ մթնոլորտում ենք մենք այսօր, թե ինչպես են սահմանափակում ազատ խոսքն ու թե ինչքան են վախենում քննադատություններից:

Ախր տրամաբանությունը լրիվ անհասկանալի է. լա'վ, ենթադրենք ֆեյսբուքի էջս կոտրեցիք, ջարդեցիք, փշրեցիք... ի՞նչ է, մտածում եք, թե դրանով ինձ կարող եք լռեցնե՞լ։ Ես մեկ այլ էջ կբացեմ, ու ավելի բուռն քննադատություններով կլցնեմ էջս, այդ դեպքում ի՞նչ եք անելու: Թե՞ հիմա էլ կփորձեք արդեն իմ «գլխին էլ գործ սարքել»... Ի՞նչ է եղել որ, մի երկու բան էլ իմ վրա կհորինեք ու «հայդա'» ձերբակալություն. դա ձեզ մոտ լավ է ստացվում: 

Բերման ենթարկելու փորձ ունեք, «ուժ» ունեք` էլ խելքը ձեր ինչի՞ն է պետք։

Ախր չգիտեմ` ծիծաղե՞մ, թե՞ ողբամ էս վիճակի ու ձեր ճղճիմության համար։ Պարզապես չեմ կարող չասել, որ Սերժ Սարգսյանի պաշտոնավարման օրոք էլ ավելի կոշտ ու դիպուկ քննադատություններով եմ լցրել իմ հիմնադրած կայքն ու ֆեյսբուքի էջս, բայց ոչ մի անգամ նույնիսկ փորձ չի արվել կոտրել ո'չ մեկը, ո'չ մյուսը:

Հիմա ինչո՞ւ եք այսպես խառնվել, ի՞նչ է պատահել, ուղիղ ու ճիշտ խոսքի՞ց եք վախենում, թե՞ սա ձեր սահմանափակ հնարավորությունների ամենահեշտ ու կարճ տարբերակն է. չկա ֆեյսբուքի էջ` չկա քննադատություն, չկա քննադատություն` չկա գլխացավանք, չկա գլխացավանք` կապրեք չաղ ու բախտավոր։

Ախր գլուխ պետք է լիներ, որ կամ ցավ զգար, կամ գիտակցեր, որ բերան փակելով ու ձայնը կտրելով` խնդիր չես լուծի։ Բայց թե ո՞ւմ եմ ասում, դուք հաքերի հոգեբանությունից այն կողմ հազիվ թե գնաք։

Արմենուհի (Արիանա) Հովսեփյան
NEWSPRESS.am-ի հիմնադիր-տնօրեն