Կարին Տոնոյանն անդրադարձել է «Հայ ասպետ» հաղորդման փակմանն ու պատասխանել որոշ հարցերի

«Հայ ասպետ» հաղորդման հեղինակ-վարող Կարին Տոնոյանը ֆեյսբուքյան իր էջում գրել է.

Երկու օր է տասնյակ լրատվամիջոցներ հարցազրույց են առաջարկում՝ կգմսն-ի վերջին լուսավորչական նախաձեռնությունների շուրջ- շնորհակալ եմ բոլորից, և որպեսզի հարցազրույցիս սև կամ սպիտակ գույն չտան, չօգտվի որևէ իշխանատենչ ճակատ, և այդքան ժամանակ չկորցնեք ոչ դուք, ոչ՝ ես, ահավասիկ այն բոլոր հարցերի պատասխանները, որ ուզում էիք ինձ տալ.

1. Հարց- Միտում տեսնո՞ւմ եմ կգմս նախարարության վարած քաղաքականության մեջ:
Պատասխան- Ոչ այնքան միտում, որքան կեղծ արժեքների և դեմոկրատիային ծառայելով հավելյալ գումարներ երկիր բերելու քողարկված քաղաքականություն: Գլոբալիզացիան՝ ժամանակակից ստրկատիրական հասարակարգը, մեծ գրպաներ ունի, գայթակղիչ է, ինչպես նաև հնարավորություն՝ պարտքերի մեջ խրված երկրիս արհեստական ու ժամակավոր շնչառություն տալու, հնարավորություն թվացյալ զարգացման զգացողություն ստեղծելու:

2. Հարց- Ասում են՝ Դուք «Հայ ասպետը» փակելու զայրույթն եք արտահայտում, այդպես է՞:

Պատասխան - Այո, զայրանում եմ, բայց իմ զայրույթի պատճառը «Հայ ասպետի» փակումը չէ, «Հայ ասպետը» փակել հնարավոր չէ, այն ամեն հայի մեջ է, հենց դրանով էր պայմանավորված մեր հաղորդաշարի նկատմամբ 10 տարի շարունակվող սերն ու հետաքրքրությունը, այն մարդկության լավագույն տեսակի՝ ասպետականության ու հայ տեսակի մասին էր, իսկ ով չի փնտրում իր մեջ այդ երկուսին.......այ, նրանք էլ դադարեցրին ֆինանսավորումը....բայց կյանքում ամենահեշտը միջոց փակելն է, ամենադժվարը նվիրումով ապրելը..... հանուն լավագույնի, հանուն քո տեսակի պահպանմանը.....
Նախարարությունը խոստացել էր մրցույթ անցկացնել մանկապատանեկան ինտելեկտուալ հեռուստանախագծերի, իրենց խոստումն անգամ չպահեցին, ուրեմն թող արդար խաղան, թող հրապարակեն ի՞նչ մրցույթով են հաղթել այդ գերժամանակակից ներկայացումների նախագծերը, ո՞րն է դրանց ֆինանսավորման նպատակը

3. Հարց- Ինչպե՞ս եք վերաբերվում Հ. լեզու և Հ. պատմություն առարկաների բուհական ծրագրերից հանելու նախագծին:

Պատասխան- Երբ մի բան լավ չի աշխատում, տանում ես մասնագետի մոտ, եթե նա գործից լավ չի հասկանում, ասում ես՝ դեն նետիր: Կամ չեն հասկանում, կամ պատվեր են կատարում: Ես ասում եմ՝ մեզ նման փոքր ազգերի համար այդ առարկաները ռազմավարական նշանակություն ունեն:

4.Հարց- Ասում են՝ դպրոցում դրանց դասավանդման մակարդակը կլավացնենք, չեք ընդունո՞ւմ:

Պատասխան- Ուրեմն նախ թող լավացնեն, բայց լավացնելուց հետո անգամ, աշակերտին երբեք չես կարող սովորեցնել այն, ինչ կսովորեցնես ուսանողին՝ պատմական վերլուծություն, մասնագիտական հայացք պատմական զարգացումներին, խոսքի մշակույթ, վերլուծելու ունակություն, բանավեճի կուլտուրա, միայն լսեք պաշտոնյաների հայերենը՝ կմկմոցով, անմիտ բառակապակցություններով, անսկիզբ, անվերջ, անկապ.....:
Աշակերտին, ուսանողին, վաղվա պաշտոնյային ու քաղաքացուն ազգային արժանապատվություն, իր տեսակի պահպանության անհրաժեշտություն ուսուցանեք, որ այսօրվա օրը չընկնենք:

Հարց- Չեք վախենում հակադրվելուց:

Պատասխան- Ոչ, ինչպես վարչապետն այսօր ասաց՝ մենք հեղափոխություն ենք արել, որ բոլորին իրավունք տանք իրենց կարծիքն ազատ արտահայտելու, կաղապարներից դուրս գալու.... իմ համոզմամբ վաղուց արդեն ժամանակն է մեր ժողովրդին ձայնազուրկի կաղապարներից դուրս գալու:

Հարց- Ի՞նչ եք պատրաստվում անել, պայքարելո՞ւ եք Ձեր իրավունքների համար:

Պատասխան- Ճշմարտությունը իրավունքի կարիք չունի, ճշմարտությունն ու արդարությունը ինքնին իրավունք են, մենք պարզապես շարունակելու ենք ավելի նվիրումով ապրել, հանուն մեր տեսակի՝ հայկականության պահպանման, բնության մեջ Աստծո ստեղծած ամեն մի տեսակ՝ անգամ բույսի կամ կենդանու, իր տեսակի պահպանման կռիվն է տալիս, սա էլ մեր կռիվն է, հասկանո՞ւմ եք, ուրեմն այն աստվածային կռիվ է»։