Վեճ և կրակոցներ ՀԱԿ անդամների կողմից. Քարակերտում հնչած կրակոցների հանգամանքները պարզվում են

Ոստիկանությունում հաստատել են շրջանառվող լուրն այն մասին, որ այսօր` նոյեմբերի 7-ի առավոտյան, Արմավիրի մարզի Քարակերտ գյուղում վիճաբանություն է եղել: Տեղեկությունների համաձայն՝ Հայ ազգային կոնգրես (ՀԱԿ) անդամ Սափեյան եղբայրները զենքով մտել են Քարակերտում տեղակայված Թալին ՋՕԸ-ի գրասենյակ: Ու, թեև լուրեր էին շրջանառվում նաև, որ հնչել են կրակոցներ, սակայն NEWSPRESS.am-ի  հետ զրույցում այդ լուրը ոստիկանությունից ո'չ հերքեցին, ո'չ էլ հաստատեցին:

Միայն տեղեկացրեցին, որ դեպքի վայրում աշխատում են, և այս պահին ճշտում են միջադեպի հանգամանքները:

«Մնացած տեղեկությունները հրապարակման ենթակա չեն»,- ասացին ոստիկանությունից: Վերջիններս միջադեպի առնչությամբ կապ են հաստատել Քարակերտ համայնքի ղեկավար Մհեր Հարթենյանի հետ:

«Երբ ոստիկանության աշխատակիցներն ինձ զանգեցին, ես մարզպետարանում դասընթացների էի. ավագանիների հետ դասընթացներ կան` ես էլ էի մասնակցում»,-NEWSPRESS.am-ի հետ զրույցում ասաց գյուղապետը, ով ոստիկաններից իմանալով միջադեպի մասին` անմիջապես վերադարձել է գյուղ:

«Գնացի դեպքի վայրը, ՋՕԸ-ի (Ջրօգտագործողների ընկերություն-հեղ) շենքի կողքը: Ճիշտն ասած՝ էնտեղ հարցրեցի, բայց կրակոցների մասին չէին լսել: Թե հիմա ո՞նց են էդ կրակոցների մասին խոսել, կամ ո՞նց են կրակել, որ էդ աշխատողները չեն լսել... չգիտեմ»,-ասաց Մհեր Հարթենյանը:

Նա նշեց, որ վիճաբանության պահին այդտեղ են եղել Սափեյան եղբայրները:

«Սափեյանները մեր գյուղից չեն, նրանք Աշնակ գյուղից են: Ես Աշնակի հետ ընդհանրապես կապ չունեմ, ու իրենք մեր տարածքները չեն սպասարկում: Ընդամենը իրենց վարչական շենքն է մեր գյուղի տարածքում, դրա համար ես իրենց հետ շփում չունեմ ու չեմ էլ ճանաչում»,-մասում է գյուղապետն ու հավելում, որ ըստ իրեն հասած լուրերի` Սափեյանները ցանկացել են իրենց որդիներից մեկին կամ պետ, կամ պետի տեղակալ նշանակել:

«Սափեյանի տղային նշանակել են տեղակալ, բայց Արագածի, Արփենիի ջրօգտագործող բնակիչները համաձայն չեն եղել: Հիմա թե դա է պատճառը, թե մեկ այլ ուրիշ խնդիր կա, ես տեղյակ չեմ: Իրենք մեզ ջուր չեն տալիս ու շատ բան չգիտեմ»,- ասաց գյուղապետը: