Սահմանադարական փոփոխություններով վերևից հեղափոխություն են կատարում

Մարզերում մարդիկ իրազեկված չեն սահմանադրական փոփոխությունների մասին, սակայն հակված են «ոչ» ասելու նոր Սահմանադրությանը: Լրագրողների հետ հանդիպման ժամանակ այսօր` նոյեմբերի 26-ին իր տեսակետը հայտնեց կրոնագետ, աստվածաբան, ԵՊՀ Աստվածաբանական ֆակուլտետի դոցենտ Վարդան Խաչատրյանը:

Ըստ նրա` մարդիկ ոչ միայն տեղեկացված չեն,  այլև սպասումներն էլ մեծ չեն. «յուրաքանչյուր սպասում այս առումով հենվում է մի բանի վրա, թե ինչպիսի դերակատարություն է ունեցել գործող Սահմանադրությունը: Մարդիկ չեն տեսնում գործող Սահմանադրության մասնակցությունն իրենց կյանքում»,-ասաց Խաչատրյանը` հավելելով, որ սա հեղափոխություն է վերևից:

Խոսելով առաջիկա հանրաքվեի ընթացքում ժողովրդի՝ իշխանության նկատմամբ վստահության մասին, Վարդան Խաչատրյանը նկատեց. «Վստահությունը լինում է կոնկրետ հիմքերի վրա: Նույնն է ասել` վստահություն ունենք, թե հանցագործներին կպատժեն, այն դեպքում, եթե ոչ մի հանցագործ պատժված չէ: Հիմա ո՞նց կարող ենք վստահ լինել, որ հանցագործությունների դեպքում պատիժն անխուսափելի կլինի, իհարկե, չենք կարող: Բացառվում է, որ մինչ հիմա առաջացած խորը կասկածը իշխանության նկատմամբ, այս անգամ հանկարծ չլինի կամ սպասենք օրինակելի, դասական ընտրությունների»,-ասաց Խաչատրյանը:

Բանախոսի նկատեց, որ մարդիկ այն համյանքներում և գյուղերում են «այո» ասում, որտեղ իշխանությունները որևէ գործ են անում. «Ճանապարհ են վերակառուցում, ջրագիծ են փոխում, մարդիկ այդ ամենը տեսնելով` ասում են, որ «այո» են ասելու»: