«Եթե այսպես շարունակվի` կարտագաղթեմ». միջազգային մրցաշարերի մրցանակակիր հայ մարզիկը ստիպված կլինի հանդես գալ այլ դրոշի ներքո (ֆոտո)

Արդեն 6 ամիս է, ինչ Հայաստանի քրոսֆիթ սպորտաձևի հիմնադիր, բոդիբիլդինգի ֆեդերացիայի անդամ Հայաստանի չեմպիոն և մի շարք միջազգային մրցաշարերի մրցանակակիր Վահրամ Հակոբյանը Հայաստանում չէ: 

NEWSPRESS.am-ի հետ զրույցում Վահրամ Հակոբյանը նկատում է, որ մասնակցել է աշխարհի մի շարք մրցումների և բավականին լավ արդյունքներ գրանցել: Նա մրցումներին մեկնել է իր միջոցներով: Ֆինանսական աջակցության համար մարզիկը, թեև մեկ-երկու անգամ դիմել է պետության աջակցությանը, սակայն ամեն անգամ մերժվելով, ի վերջո հասկացել է` իր ուժերով պետք է մեկնի: Բայց հիմա, այդ մասին չէ, որ ուզում էր խոսել:

Վահրամ Հակոբյանը պատմեց, որ 2019թ-ի մայիսին մեկնել է Լյուքսեմբուրգ` մասնակցելու հերթական մրցաշարին, երբ պարզվել է, որ, իր խոսքերով, սուտ ցուցմունքի հիման վրա, հետախուզում է հայտարարվել իր նկատմամբ:

«Ես արդեն երկրում չէի, որ իմացա իմ նկատմամբ հետախուզում է հայտարարվել»,- նշում է նա, և հավելում, որ քրգործը հարուցվել է իր և ընկերոջ նկատմամբ` մեկ այլ, երրորդ ընկերոջ հաղորդման հիման վրա: Մյուս ընկերն արդեն 3 ամիս է՝ կալանքի տակ է, իսկ ինքը, հետախուզման պատճառով չի կարողանում Հայաստան վերադառնալ: 

«Կարող է տպավորություն ստեղծվել, որ ես փախուստի եմ դիմել, բայց նախ ես մինչև երկրից մեկնելը, չեմ իմացել քրեական գործի մասին, իսկ հիմա էլ չեմ վերադառնում, քանի որ, կոնկրետ իմ գործով, չեմ վստահում իրավական համակարգին: Ես կողմնակալ վերաբերմունք եմ տեսնում այս գործում դատական համակարգի կողմից»,- ասաց մարզիկը մեզ հետ զրույցում:

Նա նշեց նաև, որ այս ընթացքում միջնորդություն է ներկայացվել դատարան, որպես խափանման միջոց գրավի դիմաց ընկերոջը ազատ թողնելու համար, սակայն դատարանը մերժել է:

Ըստ քրեական գործի մեղադրանքի՝ ՀՀ քաղաքացիներ Վահրամ Հակոբյանը և Սմբատ Ավդալյանը 100 հզ ԱՄՆ դոլար են ցանկացել շորթել մի անձից, ով նրանց վաղեմի ընկերն էր։ Այժմ Վահրամ Հակոբյանը պնդում է, որ քրգործը հարուցվել է սուտ մատնության հիման վրա: Նա հերքում է իրեն վերագրվող մեղադրանքը, բայց միևնույն ժամանակ վարանում է վերադառնալ:

Դեկտեմբերի 6-8-ը մարզիկը հրավեր ունի մասնակցելու Իսպանիայում կայանալիք աշխարհի առաջնությանը, սակայն չի կարող մասնակցել:

«Միջնորդություն ենք ներկայացրել դատարան, որպեզի հետախուզումը հանեն, որ հնարավորություն ունենամ մասնակցել առաջնությանը, սակայն դատի օրը նշանակեցին դեկտեմբերի 18-ին: Այսինքն՝ չեմ կարող մասնակցել մրցումներին և արդեն աշխարհի երկրորդ մրցումներն եմ բաց թողնում»,- ասում է նա:

Այս մասին Վահրամ Հակոբյանը ավելի վաղ գրառել էր. «Անչափ շնորհակալ եմ Հայաստանի հանրապետության իրավական համակարգից, որ ամեն ինչ անում է, ամեն ջանք ներ է դնում, որպեսզի թույլ չտա, որ ես` Վահրամ Հակոբյանս, մասնակցեմ Իսպանիայում կայանալիք աշխարհի մրցումներին: Շնորհակալություն»:

Մարզիկն ու նրա փաստաբանը վճռական են տրամադրված և անելու են ամեն ինչ, որպեսզի ապացուցեն իր անմեղությունը, սակայն ժամանակը չի սպասում, և աշխարհի առաջություններն ու մարզումները մնում են հետևում:

«Կարծում եմ, եթե այսպես շարունակվի` ստիպված հիմնական եմ արտագաղթելու. մինալու եմ այն արտագաղթած մարզիկներին, որ գնացել ու այլևս չեն վերադարձել»,- ասում է Վահրամ Հակոբյանը, ով արդեն հրավերներ ունի մի շարք երկրներից` Վրաստանից, Ռուսաստանից և ԱՄՆ-ից, իրենց դրոշի ներքո հանդես գալու համար:

 Զրուցեց` Արմինե Մկրտումյանը