Արմավիրի ոստիկանության «բեսպրիդելը»՝ վարչության պետի թողտվությա՞մբ

ՀՀ ոստիկանության Արմավիրի մարզային վարչության պետ, ոստիկանության գնդապետ Արամ Հովհաննիսյանի անվան շուրջ վաղուց են տարաբնույթ լուրեր պտտվում։ 

Վերջին դեպքերից էր Էջմիածնում տեղի ունեցած միջադեպը։ Ոստիկանության աշխատակիցները ծեծի էին ենթարկել ՌԴ քաղաքացի հանդիսացող հայ 2 երիտասարդի, ովքեր պարզապես քայլելիս են եղել դեպի Էջմիածնի եկեղեցի, երբ նրանցից մեկը հարված է զգացել իր հետևից։ Ոստիկանները տղաներին հարվածել ու գցել են գետնին։ Ծեծի ենթարկելուց հետո, ոստիկանական մեքենայով նրանց տեղափոխել են բաժանմունք, որտեղ դարձյալ ծեծի են ենթարկել նրանց։ Ոստիկանները ստիպել են տղաներին խոստովանել ինչ-որ գողություն։ Այս պատմությունն ի վերջո ավարտվել է նրանով, որ ոստիկանները երիտասարդներից ներողություն են խնդրել, թե պարզապես շփոթվել են՝ թյուրիմացություն է տեղի ունեցել, ապա տղաներին թողել են տուն գնալ։

NEWSPRESS.am-ի խմբագիրը խնդրի շուրջ պարզաբանումներ ստանալու նպատակով այցելել է Արմավիրի մարզային վարչություն, ու այնտեղ թեև անձամբ վարչության պետն է խոստացել, որ մեղավորները կպատժվեն, սակայն մինչ օրս այս հարցով ոչ մի ոստիկան ոչ մի պատիժ չի կրել։ Ու քանի որ ոստիկանները շարունակում են սովորականի նման աշխատել, ուստի չի բացառվում, որ վերոհիշյալ «թյուրիմացությունը» տեղի է ունեցել հենց վարչության պետի գիտությամբ ու նրա թողտվությամբ։ Եթե այդպես չէ, ապա Արամ Հովհաննիսյանը վաղուց պետք է աշխատանքից ազատած լիներ թյուրիմացաբար ոստիկանությունում հայտնված ու անմեղ տղաների նկատմամբ բռնություն գործադրած ոստիկաններին։ Գործն այս պահին քննվում է ՀՔԾ վարույթում։ 

Արամ Հովհաննիսյանի ենթակայության ներքո գործող վարչության աշխատակիցների այս պատմությունը թերևս միակ միջադեպը չէ։ Մեր աղբյուրների համաձայն՝ քաղաքացիներին կարող են մոտենալ նույնիսկ քաղաքացիական հագուստով ոստիկաններ, խփել նրանց կամ բերման ենթարկել։ Ու այս «բեսպրիդելը» գործում է մի իշխանության օրոք, որի անմիջական ղեկավարն ամենից շատ է խոսում օրինականության, արդարության ու քաղաքացիների իրավունքների պաշտպանության մասին։

Ընդհանուր առմամբ, անհասկանալի էր, թե նախկին պաշտոնյային ինչպես հաջողվեց գրավել նոր իշխանության ուշադրությունն ու նոր՝ ավելի բարձր պաշտոն ճանկ գցել, հատկապես այն դեպքում, երբ նրա մութ անցյալը լի է կասկածելի պատմություններով։

Արամ Հովհաննիսյանը 2014-2016թթ․ եղել է Շենգավիթի բաժնի պետ, որից հետո ազատվել է պաշտոնից ու մինչև 2018 թվականը զբաղեցրել է Կենտրոնական բաժնի պետի պաշտոնը։ Մեր տեղեկություններով՝ Հովհաննիսյանին ինչ-ինչ ճանապարհներով հաջողվել է սեփականաշնորհել Շենգավիթի բաժնի կայանատեղին, որը նա վարձակալությամբ տվել է «Աջարաբեթ» բուքմեյքերական ընկերությանը։

Անհասկանալի է, թե այդ ինչ ճանապարհով է նրան այդ ամենը հաջողվել ու ինչու նա այսօր պատասխանատվություն չի կրում իր անօրինական քայլերի համար։

Մեր տեղեկություններով՝ Արամ Հովհաննիսյանն աշխատանքից ազատել է 14 տարվա ստաժ ունեցող լավագույն մի աշխատակցի (ում անունը դեռևս չենք հրապարկում), ով պարզապես Ֆեյսբուք սոցիալական ցանցում «լայք» է դրել նախկին իշխանությունների գրառմանը։

Ու հարց է առաջանում, թե մի լայքի համար ոստիկանին աշխատանքից ազատող Հովհաննիսյանը, ինչո՞ւ չի ազատում տղաներին իբր «թյուրիմացաբար» ծեծի ենթարկածներին։ Հարց է առաջանում նաև, թե այդ ի՞նչ ծառայության դիմաց է նա հաստատվել վարչության պետի պաշտոնում․ մարզում լարված մթնոլորտ պահելո՞վ, թե՞ անմեղներին հանցագործություններ վերագրելով․․․

Իհարկե, Հովհաննիսյանի անվան հետ կապված կան ավելի շատ պատմություններ, որոնց խոստանում ենք անդրադառնալ հաջորդիվ։ 

NEWSPRESS.am