Մենք այնքան գլխանի ենք, որքան ժողովուրդը մեզ ձայն է տվել․ ԲՀԿ-ն քաղաքական բոյկոտ հայտարարեց (տեսանյութ)

Այսօր՝ դեկտեմբերի 4-ին, Ազգային ժողովում «Բարգավաճ Հայաստան» խմբակցության պատգամավոր Արման Աբովյանը քաղաքական բոյկոտ հայտարարեց։

Նա նկատեց, որ արդեն 2 օր է՝ քննարկվում է իրենց խմբակցության ղեկավար և կուսակցության նախագահ Գագիկ Ծառուկյանի նախադասությունը, որը վերաբերում է ներդրումներին։ 

«Դարձել է մառազմի և մազոխիզմի փառատոն՝ Ծառուկյանի փողերից սկսած՝ վերջացրած բոլոր-բոլոր թեմաներով, որոնք խնդրին չէին վերաբերում»,- ասաց Աբովյանն ու հավելեց, որ թեման ներդրումների մասին էր։

Նա արձագանքեց նաև ԱԺ փոխխոսնակ Ալեն Սիմոնյանի հեգնական հարցադրմանը, թե քանի՞ գլխանի եք, որ Փաշինյանին չընտրեիք։

«Էնքան գլխանի ենք, քանի ձայն, որ մեզ տվել են ընտրողները, 100 000-ից ավելի»,- ասաց Աբովյանը։

Ըստ նրա՝ փորձ է արվում փոշիացնել և լղոզել ներդրումների մասին թեման։

«Երկու օր է՝ ֆեյքերի բանակը լղոզում է այս թեման: Չի ստացվի»,- ասաց պատգամավորն ու հայտարարեց, որ նման պայմաններում իրենց խմբակցությունն այլևս չի կարող աշխատել։

«Դուք եք պատասխանը տալու, թե ինչու մենք չկարողացանք կառավարությանը մեր հարցերն ուղղել: Քաղաքական բոյկոտ ենք հայտարարում, մենք լքում ենք դահլիճը»,-հայտարարեց Աբովյանն ու ԲՀԿ խմբակցության պատգամավորները դուրս եկան դահլիճից։