«Տղա, հայերեն չե՞մ ասում»․ Ֆլեշի Բարսեղը Սերժ Սարգսյանին և իրեն վերագրվող մեղադրանքը կեղծ է որակում (տեսանյութ)

«Ֆլեշ» ընկերության նախագահ Բարսեղ Բեգլարյանը տեղյակ չէ, թե ինչ մեղադրանք է իրեն առաջադրվում: Համենայնդեպս պաշտոնապես այդ մասին իրեն ոչ ոք ոչինչ չի հայտնել:

Այդ մասին նա ասաց լրագրողների հետ զրույցի ժամանակ՝ հավելելով, որ երկուշաբթի օրը իրեն կանչել են ՀՔԾ, որտեղ էլ կիմանա խնդրի էությունը:

«Տղա, հայերեն չե՞մ ասում, տեղյակ չեմ. չեմ ստորագրել ոչ մի թղթի տակ, կգնամ, կիմանամ, կասեմ»,-ասաց նա լրագրողներին:

Ինչ վերաբերվում է ՀՀ երրորդ նախագահ Սերժ Սարգսյանին առաջադրված մեղադրանքին, ապա, ըստ Բարսեղ Բեգլարյանի, այդ մեղադրանքը կեղծ մեղադրանք է:

«Կեղծ է, այդպիսի բան բացառված է. Սերժ Սարգսյանը ի՞նչ կապ ունի իմ ֆիրմայի հետ»,-ասաց նա զայրացած:

Լրագրողների դիտարկմանը, թե Սերժ Սարգսյանը իր ընկերն է, Բարսեղ Բեգլարյանը արձագանքեց. «Հետո՞ ինչ, որ իմ ընկերն է, դուք էլ եք իմ ընկերները, բոլորը իմ ընկերներն են»,-ասաց Բարսեղյանն ու պնդեց, որ ինքը տեղյակ չէ իրեն առաջադրվող մեղադրանքից: Նա վստահեցնում է, որ երբ ՀՔԾ-ից կանչել են հարցաքննության, նույնիսկ չի էլ հետաքրքվել, թե ինչու են կանչում: Այյդ այցերը, նրա որակմամբ, սովորական են դարձել:

Հիշեցնենք, որ Սերժ Սարգսյանին և Բարսեղ Բեգլարյանին մեղադրանք է առաջադրվել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով (Պետությունից վատնելու եղանակով առանձնապես խոշոր չափերով գումարի հափշտակության կատարմանը դրդելու համար)։