Լրատվական խմբագրությունը «տակնուվրա» են արել, իսկ Փաշինյանի ՖԲ «լայվը» իր դստեր մեքենայի մասին «լո-լո»-ներն է

Վարչապետ Նիկոլ Փաշինյանը ֆեյսբուքյան իր հերթական «լայվը» վերնագրել է «Զրույց քաղաքացու հետ. «Վարչապետի դստեր մեքենայի» մասին»։

«Էդ ես չեմ ուզել մեքենա գնել, էդ օրենքն է պահանջում, որ մենք մեքենա ունենանք»,- ասաց Փաշինյանն ու այս համատեքստում նա ամբողջ 22 րոպե և 30 վայրկյան բացատրում ու փորձում էր համոզել «իրեն ընտրած ժողովրդին», որ մեքենաները, որոնք գնվել են իր ընտանիքի անդամների համար՝ անվտանգության նկատառումով են գնվել։

Այստեղ հարցն արդեն այն չէ, որ Մարիամիկի մեքենայի մասին լուրը տարածվելուց հետո, սկսեցին արդարացումներ վարչապետի խոսնակ Վլադիմիր Կարապետյանի մակարդակով, հետո Մարիամիկն ինքը ասաց, որ այդ մեքենան «ծառայելու է հայրենիքին» և ապա հերթը հասավ «թագավորի» մակարդակով արդարացմանը։

Բայց երևի Փաշինյանի սիրտն ու հոգին չէր թեթևացել արդարացումներից հետո և նա իր՝ մոտ 23 րոպե տևած լայվից հետո մեկ այլ գրառմամբ նորից անդրադարձել էր հույժ կարևոր, երկրի թիվ մեկ խնդրին։ Նա հիշեցրեց, որ պետական ապարատում կրճատել է ծառայողական մեքենաների թիվը․․․

Բայց դա էլ չի թեթևացրել Փաշինյանի հոգուն իջած բեռը, ու նա ՊՊԾ-ի արխիվից հանել է տվել այն փաստաթուղթը, որով իբրև նշվում է, թե կոնկրետ երբ է ձեռք բերվել մեքենան․․․

Մի խոսքով՝ Փաշինյանի ամբողջ էջի գրառումները վերաբերում են նրան, որ ինքն ու դուստր Մարիամը մեքենա չեն ուզում, բայց ստիպված են ունենալ, քանի որ օրենքն է պահանջում ու իրենք էլ չեն կարող հակառակվել այդ օրենքին։

Հարկ է նկատել նաև, որ Փաշինյանը պահպանության մասին օրենքից խոսում էր հենց այն օրը, երբ պարզ էր դարձել, որ անհայտ անձինք ներխուժել են «Ժողովուրդ» օրաթերթի խմբագրություն։

Լրագրողների անվտանգության մասին ու նրանց նկատմամբ բռնությունը դատապարտող հայտարարություններով հանդես եկան գրեթե բոլոր կազմակերպությունները, քաղաքական ուժերն ու գործիչներ, սակայն Փաշինյանն ինքը կես բառով անգամ չանդրադարձավ կատարվածին։

Ի՞նչ է ստացվում, իր աղջկա մեքենան ավելի՞ կարևոր է, քան լրագրողների անվտանգության հարցը, թե՞ խմբագրության ներխուժումն օրինական էր ու նորմալ էր դիտվում․․․

Թե ինչու չխոսեց Փաշինյանը լրագրողների նկատմամբ տեղի ունեցած միջադեպի մասին՝ մեկնաբանությունները թողնենք ընթերցողին․․․

Այստեղ ևս մեկ հարց է առաջանում․ կլռե՞ր Փաշինյանը, թե նույն ոտնձգությունը տեղի ունենար իր ընտանիքին պատկանող «Հայկական ժամանակի» նկատմամբ։ Իհարկե ո՛չ, Մարիամիկի մեքենայի մասին պատմությունն ու արդարցումները վկա․․․