Անդամահատված ոտքերի սուր ցավերը թույլ չեն տալիս աշխատել ու օրվա հացը վաստակել. քաղաքացին օգնության կարիք ունի (ֆոտո, վիդեո)

2011 թվականին Արարատի մարզի Այնթապ գյուղի բնակիչ Գառնիկ Հակոբյանի երկու ոտքը անդամահատել են: Նա երեք անգամ վիրահատվել է։ Սխալ վիրահատության ու իր խոսքով, բժիշկների անփութության հետևանքով, Գառնիկը կանգնել է խնդիրների առաջ:

NEWSPRESS.am-ն արդեն անդրադարձել է Գառնիկ Հակոբյանի առողջական ու սոցիալական խնդիրներին: Օրերս դարձյալ նա դիմեց խմբագրություն` տեղեկացնելով, որ ցավերը չեն դադարում և բուժօգնության կարիք ունի:

57 ամյա Գառնիկ Հակոբյանը վստահեցնում է, որ ի վիճակի է աշխատել, սակայն ցավերի սուր նոպա է սկսել իր մոտ, որին չի կարողանում դիմակայել: 2018-ի մարտ ամսին դարձյալ հիվանդանոց են տարել, սակայն մեր զրուցակիցը պնդում է, որ դրանից հետո վիճակն ավելի է վատացել:

«Անկողնային վիճակում եմ, ցավերն ինձ տանջում են: Պրոթեզները հագնում եմ, մ քիչ մնում հիմա էլ մեջքս է սկսում ցավել: Բժիշկներն ասում են ողնաշարդ պետք է բուժես, բայց ոնց անեմ...»,-ասում է Գառնիկ Հակոբյանն ու նկատում, որ դժվարանում է քայլել:

Նա ասում է, որ դիմել է կառավարությանն ու պատկան մարմիններին, սակայն պատասխանել են, թե բյոջեում գումար չունեն:

«Եթե գումար չունեն, էդ ոնցա Փաշինյանն իր աղջկան միլիոնանոց մեքենա նվիրել, իսկ հիվանդի համար գումար չունեն: Գոնե թող բժիշկներին ասեն, որ ինձ բուժեն: Ես էս վիճակով էլի կաշխատեմ, մեքենաս կքշեմ, ու պարապ չեմ մնա»,-ասում է մեր զրուցակիցը:

Նա պատկան մարմինների ուշադրության կարիքն ունի.

«Ուզում եմ բուժվեմ ու իմ կտոր ցամաք հացը սեփական քրտինքով վաստակեմ»,-ասաց նա:

Հարկ է նկատել, որ այս ընթացքում Գեղամ Հակոբյանի խնդրին անդրադարձել են մի քանի լրատվամիջոցներ, անգամ նա իր խնդիրն է ներկայացրել «Կիսաբաց լուսամուտներ» թոք-շոուի ժամանակ, սակայն ոչ ոք և ոչ մի կերպ չի արձագանքել նրա օգնության կանչին: Ոտքերից զրկված տղամարդը հույս ունի, որ այս անգամ նրա ձայնն անարձագանք չի մնա: Իսկ խնդրանքը միայն մեկն է` բժշկական օգնություն, որպեսզի ցավերը թուլանան և կարողանա աշխատել:

Արմինե Մկրտումյան