Սոլեյմանիի ձեռքերը թաթախված էին արյունով. Դոնալդ Թրամփի հայտարարությունը

Ամերիկացի ոչ մի զինվոր չի վիրավորվել անցյալ գիշեր իրանյան զինված ուժերի կողմից Իրաքի ամերիկյան բազաների ուղղությամբ իրականացված հարվածի հետևանքով: Այս մասին իր խոստացած հայտարարության ժամանակ քիչ առաջ ասաց ԱՄՆ նախագահ Դոնալդ Թրամփը։

«Մենք ոչ մի զոհ չունենք: Բոլոր մեր զինվորները ապահով են, և միայն նվազագույն վնաս է եղել մեր ռազմաբազաներում», – ասաց Թրամփը։

ԱՄՆ նախագահի խոսքերով՝ Իրանը կարծես թե նահանջում է, ինչը լավ է բոլոր մտահոգ կողմերի համար և ամբողջ աշխարհի համար:

Թրամփը հայտարարեց, թե Սոլեյմանին ղեկավարել է ամերիկյան զորքերի դեմ վերջին գործողությունները: Ըստ ԱՄՆ նախագահի՝ վերջին օրերին նա պլանավորում էր նոր հարձակումներ ամերիկյան թիրախների ուղղությամբ, և ամերիկյան կողմը կանգնեցրել է նրան։

Նախագահը նաև հայտարարեց, որ ԱՄՆ-ը պետք է անհապաղ պատժամիջոցներ սահմանի Իրանի նկատմամբ:

«Նրանք վանկարկում էին «Մա՛հ Ամերիկային» այն օրը, երբ մենք ստորագրեցինք միջուկային գործարքը»,- ասել է Թրամփը։

Թրամփը Եվրոպային կոչ է արել հրաժարվել իրանական միջուկային «հիմար» գործարքի մնացորդներից։

Նա հայտարարել է, որ ծրագրում է ՆԱՏՕ-ի դաշնակիցներին խնդրել «դառնալ մերձավորարեւելյան գործընթացի ավելի ակտիվ մասնակից»։ Նա նշել է, որ իր ղեկավարությամբ ԱՄՆ տնտեսությունը, ինչպես նաեւ երկրի ԶՈՒ-ն ավելի ուժեղ է դարձել՝ հավելելով, թե դրանք ձեռքբերումներ են, որ շատերին անհասանելի էին թվում։

Թրամփի խոսքերով՝ ԱՄՆ-ը բավարար նավթ ու բնական գազ ունի, եւ լինելով աշխարհում առաջին արտադրողը՝ նրան պետք չէ մերձավորարեւելյան նավթը։

Նա Իրանին նախազգուշացրել է, որ ամերիկյան հրթիռները «մեծ են, հզոր, ստույգ եւ մահաբեր»՝ միաժամանակ նշելով, թե չի ուզում ուժ կիրառել։

Թրամփը ասել է, որ ԱՄՆ-ը բաց է Թեհրանի հետ բանակցությունների համար։

Նա նաեւ պաշտպանել է գեներալ Սոլեյմանիին սպանելու իր վարչակազմի որոշումը՝ ասելով, թե «նրա ձեռքերը թաթախված էին ինչպես ամերիկյան, այնպես էլ իրանական արյունով» եւ նրան «վաղուց էր պետք սպանել»։