«Մենք մեկ-երկու կատակ արեցինք, այդքանը». Միրզոյանը՝ Թովմասյանի հետ հանդիպման մասին

Քաղաքական հետապնդումների մասին խոսք լինել չի կարող: Այս մասին լրագրողների հետ զրույցում ասաց Ազգային ժողովի նախագահ Արարատ Միրզոյանը՝ անդրադառնալով ՍԴ նախագահ Հրայր Թովմասյանի շուրջ տեղի ունեցող իրադարձություններին:

Դիտարկմանը, թե Հրայր Թովմասյանը հայտարարել է, որ դեռ ամիսներ առաջ իրեն զգուշացրել էին, որ եթե հրաժարական չտա, իր նկատմամբ մեղադրանք կառաջադրվի, Արարատ Միրզոյանն արձագանքեց. 

«Հրայր Թովմասյանի կամ որևէ այլ անձի երբևէ կատարած կամ առերևույթ կամ իրեն մեղսագրվող հանցագործությունը կապ չունի այս պահին կամ երբևէ նախկինում ունեցած պաշտոնի հետ»:

Միրզոյանը չմեկնաբանեց մամուլում հայտնված այն լուրերը, թե իշխանությունները ՍԴ անդամների անձնական կյանքի, արտամուսնական կապերի վերաբերյալ տեղեկություններ են հավաքում, որպեսզի նրանց ստիպեն վաղաժամ թոշակի գնալ:

«Եկել անհեթեթությունների մասին ինձ հարցեր եք տալիս: Ես այդքան ժամանակ չունեմ, որ որեւէ մտացածին վարկածներ մեկնաբանեմ»,-ասաց նա:

Ամեն դեպքում, Միրզոյանը չի համարում, որ ՍԴ հարցը հանգուցալուծում է ստացել: Նրա որակմամբ, ՍԴ-ում ճգնաժամ է, որը սակայն, ըստ ԱԺ նախագահի, կապ չունի Թովմասյանի նկատմամբ հարուցված քրեական գործի հետ:

«Ոնց որ ես հիմա որևէ հանցագործություն անեմ, հետո, երբ մեր իշխանությունը կփոխվի, իրավապահ համակարգը սկսի հետազոտել իմ որևէ արած հանցագործություն, և ես ասեմ՝ այ, քանի որ ես զբաղեցրել եմ պաշտոն, ինձ քաղաքական հետապնդման են ենթարկում: Եկեք այս երկու երեւույթներն իրար հետ չկապենք»,-ասաց նա:

Անդրադառնալով Սուրբ Ծննդյան պատարագին, որի ժամանակ հանդիպել են Հրայր Թովմասյանի հետ, Միրզոյանը նշեց, որ այդ օրը Թոմասյանի շուրջ տեղի ունեցող իրադարձությունների մասին խոսք չի եղել. «Մենք մեկ-երկու կատակ արեցինք, այդքանը»:

Ինչ վերաբերում է ՍԴ-ի շուրջ խնդիրը լուծելու վերաբերյալ իշխանության հաջորդ քայլերին, ԱԺ նախագահն ասաց. «Կապրենք, կտեսնենք»: