Մեկը տեղից վեր է կացել ու վարչապետին ասել՝ գիտե՞ս, փող կպցնելու տարբերակ կա․ վարորդները բողոքում են բալային համակարգի դեմ (տեսանյութ)

Վարորդները բողոքի ակցիա են կազմակերպել կառավարության դիմաց։ Արդեն մի քանի օր է՝ նրանք բողոքում են երթևեկության տուգանքների բալային համակարգի դեմ։

«Իրավունքի սահման» ընկերության անդամները միացել են այն բոլոր վարորդներին, ովքեր Տարածքային կառավարման և զարգացման նախարարությունից նամակներ են ստացել առ այն, որ մի քանի 100 000 տուգանքներ են վճարելու։

«Գիտե՛ք, ոնց որ մեկը տեղից վեր է կացել ու վարչապետին ասել՝ գիտե՞ս, փող կպցնելու տարբերակ կա․ արի տաքսու հազիվ օրվա հացի փող աշխատող վարորդների վրա տուգանք դնենք, թող բերեն բոլորով 1 միլիարդ դրամ վճարեն»,- լրագրողների հետ զրույցում կեսկատակ, կեսլուրջ ասացին վարորդները։

Նրանք փորձում էին հանդիպել նախարար Սուրեն Պապիկյանի հետ, ով իրենց տեղեկություններով այդ պահին կառավարության շենքում էր։ Սակայն ոչ Պապիկյանը, ոչ էլ նախարարության որևէ այլ ներկայացուցիչ չհանդիպեց նրանց հետ։

Վարորդները վստահեցնում են, որ այն, ինչ ներկայացվել է իրենց որպես երթևեկության կանոնակարգում, խելամիտ չէ և այնպիսի տպավորություն է, որ որոշում կայացնողներն ընդհանրապես ոչ մի կապ չունեն մեքենայի կամ վարորդների հետ։

Հիշեցնենք, որ այս տարվա հունվարի 1-ից ուժի մեջ է մտել տեսանկարահանող սարքերով և արագաչափերով արձանագրված խախտումների մասին դրույթներ, ըստ որոնց յուրաքանչյուր վարորդի տրվում է 9 բալ։ 

Եթե վարորդը մեկ տարվա ընթացքում սպառում է բոլոր բալերը, ապա կես տարով զրկվում է վարորդական իրավունքից, սակայն իրավունք ունի 3 ամիս անց հանձնելու տեսական քննություն և վերականգնելու վարորդական իրավունքը: Եթե վարորդը չի օգտվում այդ իրավունքից, ավտոմատ կերպով, վարորդական իրավունքից զրկելուց հետո կես տարի անց, իրավունքը վերականգնվում է: Վարորդին կրկին տրվում է 9 բալ: Եթե նա նորից սպառում է այդ բալերը մեկ տարվա ընթացքում, ապա վարորդական իրավունքն այս անգամ վերցվում է վարորդի ձեռքից, և վարորդը ստիպված է լինում մեկ տարի անց հանձնել տեսական և գործնական քննություններ: Ինչպես նաև նախատեսվում է մեկ այլ հնարավորություն, եթե բալերը սպառվում են, ապա կարելի է քննություն հանձնել և մի քանի լրացուցիչ բալ ստանալ: