Հեղափոխություն չի սա, անձի տեղափոխություն ա․ հեղափոխություն կլիներ, եթե մի զոհված զինվորի գործ բացահայտեիք (տեսանյութ)

Դեռ հեղափոխության սկզբնական շրջանում, խաղաղ պայմաններում զոհված ժամկետային զինծառայող Արման Մուրադյանի հայրը՝ Հովսեփ Մուրադյանը, վստահեցնում էր, որ ՀՀ երրորդ նախագահ Սերժ Սարգսյանին մերժելով՝ երկրում ոչինչ չի փոխվի։

Հեղափոխությունից 2 տարի անց, Հովսեփ Մուրադյանն իր տեսակետն, այս առումով, չի փոխել։ Նա շարունակում է պնդել, որ իր որդուն սպանել են և հեղափոխությունը չօգնեց բացահատել գործը։

Հովսեփ Մուրադյանը, NEWSPRESS.am-ի հետ զրույցում, արդեն մի առիթով պատմել է, որ իր տղան զորակոչվել է բանակ 2011 թվականին։ 2012-ից տեղափոխվել է Մարտակերտ, ծառայել ԼՂ պաշտպանության բանակում: Սակայն այդպես էլ չի վերադարձել տուն:

2013-ի հուլիսի 30-ին Արամի դին հայտնաբերվել է դիրքերում՝ հրազենային վնասվածքով: Արմանի ծնողներին հայտնել են, թե իրենց որդին ինքնասպան է եղել, բայց նրանք չեն հավատում այդ վարկածին ու պնդում են, որ որդուն սպանել են:

Այժմ նա ուզում է արդար դատավարություն իրականացնել ու պատժել որդուն սպանողին։ Այսօր՝ հունվարի 23-ին, կառավարության դիմաց խաղաղ պայմաններում մահացած զինվորների ծնողների հետ միասին, Մուրադյանը եկել էր իր խնդրի լուծման պահանջով։

«Պարոն Փաշինյան, ես դիմում եմ Ձեզ, սթափվե՛ք։ Երկու տարին էլ հերիք է Ձեզ, որ կարողանաք դատական համակարգը կարգի բերեք։ Հեղափոխություն չի եղել, եղել է անձերի փոփոխություն՝ ոչ մի տարբերություն չկա»,- լրագրողների հետ զրույցում ասաց Մուրադյանը։ Նա նկատում է, որ Փաշինյանը մի կողմից խոսում է աղքատության վերացման մասին, մյուս կողմից ամեն ամիս պարգևավճարներ են տալիս նախարարություններում։

«Էլ աղքատությունը ո՞նց եք ուզում վերացնել, պարոն Փաշինյան»։

Մանրամասները՝ տեսանյութում