Եթե պետք է պարոն Միրզոյանը ձեզ զսպի, որ դեգրադացիայի չենթարկվեք, ուրեմն ցավում եմ ձեզ համար․ Գորգիսյանը՝ իմքայլականներին (տեսանյութ)
«Այս շենքում ինչ կատարվում է, այդ ամենը քաղաքական է և դրանից պետք չէ բողոքել, պարզապես պետք է նկատի ունենալ, որ ցանկացած արարք ունենում է քաղաքական հետևանքներ»։ Այս մասին Ազգային ժողովում ելույթների ժամին ասաց «Լուսավոր Հայաստան» խմբակցության պատգամավոր Գևորգ Գորգիսյանը` դիմելով «Իմ քայլը» խմբակցությանը:
Նրա գնահատմամբ` Երևանի քաղաքապետարանի կոռուպցիոն ռիսկերն ուսումնասիրելու «Իմ քայլը» խմբակցության մերժումը հիմնավորված չէր իրավական հիմնավորումներով։
«Փաստացի դուք ասում էիք՝ եկեք, մեր քաղաքապետի կոռուպցիոն սխեմաների մեջ մի մտեք, մենք էլ վաղը, երբ դուք ունենաք քաղաքապետ, չենք մտնի: Չէ, սիրելիներս, կոռուպցիայի դեմ այդպես չեն պայքարում, միայն խոսքերով չի կարելի, է»,- ասաց Գորգիսյանը։
Նրա խոսքով` իշխանությունն ունի լեգիտիմություն, սակայն դա չպետք է բերի ամենաթողություն, որովհետև հետևանքները շատ վատ են լինում։
«Ասում եք՝ եթե պարոն Միրզոյանը չլինի, քաղաքական դեգրադացիայի կենթարկվենք, է, մի ենթարկվեք, եթե պետք է պարոն Միրզոյանը ձեզ զսպի, որ քաղաքական դեգրադացիայի չենթարկվեք, ուրեմն ցավում եմ ձեզ համար, սիրելիներս»,- ընդգծեց պատգամավորն ու հավելեց․ «Կարծում եմ՝ պարոն Միրզոյանը ձեր պաշտպանության կարիքը չունի»։
Մանրամասները՝ տեսանյութում
