Մսխվում է երկրի հեղինակությունը․ Հրայր Թովմասյանը՝ ՍԴ շուրջ իրականացվող գործողությունների մասին (տեսանյութ)

Մսխվում է երկրի հեղինակությունը։ Այս մասին լրագրողների հետ զրույցում հայտարարեց Սահմանադրական դատարանի նախագահ Հրայր Թովմասյանը՝ իր բնակարանում կատարված խուզարկությունից հետո։

Նա հիշեցրեց, որ 2-3 անգամ հրավիրվել է հարցաքննության, այսօր էլ իր տանն է ինչ-որ քննչական գործողություններ կատարվել և կարևորեց, որ այդ ամենին տրվում է հանրային հնչեղություն։

«Իմ խնդրանքը, միջնորդությունը, հորդորը, եղել է մեկը, որ ամբողջը տեսաձայնագրվի, որովհետև ես ձեզ ուղղակի վստահեցնում եմ, որ այն, ինչ այսօր կատարվում է, այսօրով չի ավարտվելու։ Ցավոք սրտի, դրանք նոր քրեական գործերի հիմք են դառնալու, և այդ ժամանակ ապացուցողական բազան, թե ով ինչ ասեց, ինչու ասեց, չի լինելու։ Եվ իմ միջնորդությունը ես միշտ կրկնելու եմ, որ այդ ամբողջ հարցաքննությունը տեսաձայնագրվի։ Իմ համար անհասկանալի է քննչական մարմնի ձեռնպահ մնալը և մերժելը մեր միջնորդությունը, որ հարցաքննությունը և տան խուզարկությունը չձայնագրվի, որպեսզի հետո տարբեր մեկնաբանություններ չլինեն»,- նշեց նա։

Հրայր Թովմասյանի դիտարկմամբ, այն, ինչ այս օրերին տեղի է ունենում իր և ՍԴ շուրջ, գալիս է հիմնավորելու որ խնդիրներն իրոք խորքային են։ 

«Օրվա իշխանությունը խնդիր ունի արագ ձերբազատվելու ինձանից՝ որպես ՍԴ նախագահի, և այդ ամբողջն արվում է շատ կոպիտ, այդ ամբողջն արվում է արդեն ակնհայտ։ Դրա մասին իմ ասելով չի, որ մեր հանրությունը և նաև միջազգային հանրությունը տեղյակ է։ Սրա համար ես միայն ցավ եմ ապրում, քանի որ ինձ համար Հրայր Թովմասյանի խնդիրն այս պարագայում երկրորդական է, երրորդկան է։ Շատ ավելի կարևոր է ինձ համար երկրի հեղինակությունը, երկրի վաղվա օրը։ Չի կարելի այդքան տարիներ հավաքած հեղինակությունը շատ արագ մսխել»,- ասաց Հրայր Թովմասյանը։

Նա նշեց, որ այն ինչ ակնհայտ երևում է, դա ընդամենը 10 տոկոսն է այն ամենի, ինչ իրականում տեղի է ունենում։