Երբ կան բազում վախեր և չկա ասելիք` հարցերի պատասխաններն իջնում են սկետչի մակարդակի (տեսանյութ)
Վարչապետ Նիկոլ Փաշինյանն իրեն չի զգում մի մարդու կարգավիճակում, ով կարող է մտավախություններ ունենալ: Կապանում կազմակերպված մամուլի ասուլիսի ժամանակ, լրագրողը հետաքրքրվեց, թե մտավախություն չունի՞ Փաշինյանը, որ կարող է հեղաշրջում լինել, հատկապես երբ ՀՀ անվտանգության խորհրդի քարտուղարը համանման հայտարարություն է արել, իսկ ԱԱԾ նախկին ղեկավար Արթուր Վանեցյանն էլ հայտարարել է, թե կարող է շատ բաներ ասել:
Փաշինյանն, ըստ էության, չպատասխանեց հարցին: Նա անհեթեթ պատասխանով շրջանցեց հարցը: Համենայնդեպս երկրում հասունացող դժգոհությունների, այդպես էլ չիրականացրած խոստումների, արտագաղթի ավելացման ու նորանոր այլ խնդիրների ֆոնին, Փաշինյանը, ինչպես ասում են, որպես «ժողվարչապետ», չպետք է այդպես ցինիկ պատասխան տար: Նա Ազգային անվտանգության ծառայության նախկին պետի հայտարարությունը համեմատեց Կարգին Հայկոյի սկետչի հետ` լրագրողին հորդորելով, որ գնա և նայի այդ կարգին սկետչը, որպեսզի ստանա իր պատախանը:
«Յութուբում որոնեք, գտեք Էն որ գժանոցում մեկը անընդհատ ասում ա` ես ամեն ինչ գիտեմ, հետո էլի ա ասում` ես ամեն-ամեն ինչ գիտեմ, հետո էլի ա ասում, ես ամեն-ամեն -ամեն ինչ գիտեմ... իսկ վերջում հայտնվում է հիմար վիճակում։ Հիմա բոլոր նրանք, որոնք հայտարարում են, որ ամեն, ամեն ինչ գիտեն, այսօրինակ սկետչի հերոսներ են»,- նշեց նա։
Փաշինյանը նույն այս պատասխանով արձագանքեց լրագրողի նաև մյուս հարցին, որը վերաբերում էր Արթուր Վանեցյանին ու ոստիկանապետ Վալերիյ Օսիպյանի ազատմանը: Լրագրողը հարցերեց, թե արդյոք կապվա՞ծ էին այս ազատումները հեղաշրջման փորձի կամ նմանատիպ այլ շարժման հետ, ինչին Փաշինյանն ասաց.
«Գնա էդ սկետչը նայի` պատասխանը կիմանաս»:
Լրագրողի դիտարկմանը, որ հարցը ուրիշ բանի էր վերաբերում և ևս մեկ հարց մնաց անպատասխան, Փաշինյանը դարձյալ արձագանքեց.
«Բոլոր հարցերի պատասխանները էդ սկետչի մեջ կգտնեք` առաջինն էլ, երկրորդն էլ»։
Իհարկե, իշխանամետ և «վարչապետապաշտ» զանգվածը կարող է ծափահարել և ուրախանալ Փաշինյանի ոչինչ չասող պատասխանների համար, այն պատասխանների, որտեղ չկար լրջություն, ու որոնք նույնիսկ ինքը` Փաշինյանը, փաստորեն իջեցրեց կարգին հաղորդման սկետչի մակարդակի...
Իրականում Փաշինյանն ունի բազում մտավախություններ, որոնցից առաջինը նրա համար, իշխանությունը կորցնելն է: Այս հարցն ամեն անգամ նրան գցում է հիստերիայի մեջ, թե թող փորձեն` ողնաշարը կկոտրենք ու էլի նման սպառնալիքներ է հնչեցնում:
Հայտնի ասացվածք կա` արջն իր ահից է գոռում, ու Փաշինյանը գոռում կամ սպառնում է, քանի որ ունի բազում մտավախություններ և չունի ասելիք...
