«Ինքնասպանվող» զինվորները, Նիկոլի մատի փաթաթան դարձրած «բանակի սնունդն» ու նրա զինվոր որդու սնվելը ռեստորանում

Բանակն «արգելված թեմա» է, և դա ճիշտ է. չի կարելի մեր զինված ուժերի «լվացքը» փռել թշնամու աչքի առաջ: Այստեղ սխալն այն է, որ բանակում ինչպես եղել, այնպես էլ շարունակում  են մնալ խնդիրներ, կամ «կեղտոտ լվացք» (ինչպես կուզեք` անվանեք դա), որը չփռելով` չես տեսնի կեղտը ու չես լվա այն...

Որքան էլ այսօրվա իշխանություններն ամպագոռգոռ հայտարարություններով ու իրենց «մեջտեղից ճղելով» փորձեն համոզել, թե բանակում ամեն ինչ կարգին է, այնուամենայնիվ խնդիրները, մեկը մյուսի հետևից շարունակում են գլուխ բարձրացնել, ու դրանց լուծում տալը միայն բարձր խոսելով չէ, քանի որ բանակը դրանից ավելի կարգապահ չի դառնում:

Այսօր, ինչպես և նախկին իշխանության օրոք, բանակում շարունակվում են «ինքնասպանությունները», ինչը ևս մեկ անգամ ապացուցում է, որ բանակում ինչ-որ բան այն չէ: Ու այդ «ինչ-որ բան»-ը շարունակում է ժանտախտի նման տարածվել ու մնալ` ինչպես նախկին, այնպես էլ այսօրվա իշխանությունների կոկորդին կանգնած ոսկոր, որից ազատվել, կամ չեն ուզում, կամ չեն կարողանում...

Ու ստացվում է, որ այս վտանգավոր ու «արգելված թեման» վերջնականապես լուծելու փոխարեն, իշխանությունները, որոնք, այս անգամ ի դեպ, ժողովրդի ընտրյալներն են, շարունակում են թոզ փչել մարդկանց աչքերին, թե` բանակում ամեն ինչ շատ լավ է, նախորդ տարվա համեմատ էլ 2019-ին ավելի քիչ զինվոր է մահացել...

«Խնայե՞ս», թե՞ ասես այս հայտարարությունն արած երկրի գերագույն գլխավոր հրամանատար կոչվող մարդուն, որ սպանված զինվորի մոր սիրտը չի հովանում նրանից, թե երկու զինվորով քիչ սպանվեց, ու գոռում է, թե` իր տան ճրագը մարեց...  «Խնայե՞ս», թե՞ ասես այդ մարդուն, որ բանակում շարունակում է «բեսպրեդելը»... Խնայե՞ս, թե՞ ասես այդ գերագույնին, որ երբ մի զորամասում միանգամից մի քանի պաշտոնյաների երեխաներ են «հայտնվում», ու աջ ու ձախ իրենցն անում, դա պատահականություն չէ, այլ բանակում տիրող անկարգություն... «Խնայե՞ս», թե՞ ասես ժողովրդի ընտրյալին, որ զինվորը հենց այնպես բանակում ինքնասպան չի լինում, ու այս ամենի անվերահսկելությունը գալիս է բանակի բարձիթողի վիճակից ու հենց իր հայտարարություններից, թե ամեն ինչ լավ է... Ի վերջո, «խնայե՞ս», թե՞ ասես այդ մարդուն, որ բանակում իսկապես ամեն ինչ լավ կլիներ ու դրական փոփոխություններ կլինեին, եթե խաղաղ պայմաններում զոհված գոնե մի զինվորի դեպք բացահայտվեր ու պատժվեր նրան սպանողը կամ սպանության հասցնողը...

Իհարկե, բանակի խնդիրներից շատ կարող ենք խոսել, բայց այս ամենին գուցե չանդրադառնայինք, եթե բանակի բարեփոխումների մասին գոռացող միևնույն մարդը «բանակի լավ սնունդը» գոնե մատի փաթաթան չսարքեր ու «չշփեր» այն բանակի թերությունների մասին խոսացողների դեմքին... Զինվորին մատուցված համեղ խորովածն անգամ չի կարող մեղմել` «թող իմ երեխեն շան միս ուտեր, բայց կողքիս լիներ», ասող մոր սիրտը...

Բազմիցս է ասվել` բանակում սնունդը ևս կարևոր է, բայց այն «ռեստորան» չէ և այստեղ ավելի շատ պետք է կարևորվի ոչ թե սնունդը, այլ կարգուկանոնը և «բեսպրեդելի» վերացումը. ու եթե բանակում կա խնդիր, ապա հենց դա է թիվ մեկ խնդիրը...

Այնուամենայնիվ, այսքանով հանդերձ, դարձյալ չենք կարող չասել, որ բանակի սննդի մասին այդքան բարձրաձայնող վարչապետի տղան` Աշոտ Փաշինյանը, պարզվում է՝ շատ հաճախ, իր թիկնապահներով, գնում է  սնվելու հենց ամենաիսկական ռեստորանում: Ու ստացվում է, որ այնուամենայնիվ, բանակում սնունդը այնքան էլ լավ չէ, մինչդեռ Փաշինյանը, բանակի բարեփոխումների մասին խոսելիս, սիրում է առաջինը հենց դա ներկայացնել...

Սա իր հերթին... մյուս կողմից էլ, Փաշինյանը շահարկելով բանակի, զինվորի հարցը, փորձում է մանիպուլյացիայի ենթարկել մարդկանց:

Այս անգամ նրա մանիպուլյացիաների զոհ դարձավ Արշակ Զաքարյանը, ում ռեստորանում սնվել էր Փաշինյանների ընտանիքը: Նիկոլն այնքան հիմար չէ ու հասկանում է, որ ոչ բոլորը կարող են Արցախը, ինչպես ասում են, ջրի ճամփա սարքել, զինվոր որդուն հաճախակի տեսության գնալ ու ռեստորանում հաց ուտել: Ուստի պատահական չէր, որ նա «չտրամադրված ՀԴՄ»-ի թեման ծամոն սարքեց, ու գցեց «ժող ջան»-ի բերանը, որպեսզի մարդիկ խոսեն, ոչ թե «զինվորից գողացած հացի» գումարով Նիկոլի Արցախ մեկնելու մասին, այլ շրջանառեն Արշակ Զաքարյանի ռեստորանի չաշխատող սարքի ու ՀԴՄ-ի թեման...

Բայց, չխոսենք այդ ճղճիմ երևույթներից ու մնանք այն պնդմանը, որ քանի դեռ բանակում չեն ջախջախվել արատավոր վարքերն ու բարքերը, ամեն անգամ մի տան ջրագ է մարվելու, էլ չենք խոսում երկրի վտանգված անվտանգության մասին...

Արմինե Մկրտումյան