Պետք չէ մեզ հավասարեցնել անկիրթ ցեղերին. իշխանության մեծ մասն առաջին դեմքերով տեղում չէ. Լարիսա Ալավերդյան

Այսօր փորձում են նմանեցնել անկիրթ ցեղերի հավաքածուի կամ խմբի: Դա համայն հայության խնդիրը պետք է դառնա: Այս մասին լրագրողների հետ հանդիպմանն ասաց «Ընդդեմ իրավական կամայականությունների» ՀԿ գործադիր տնօրեն Լարիսա Ալավերդյանը՝ խոսելով Սահմանադրական դատարանի շուրջ ստեղծված իրավիճակի մասին:

«Պետք չէ մեզ հավասարեցնել անկիրթ ցեղերին: Այն գործելաոճը, որը հիմա որդեգրվել է, ավելի հեռու գնացող խնդիրներ է լուծում: Ամբողջովին հայությունը, որն ունի քաղաքակրթության մեջ իր ուրույն հետքը»,-ասաց Լարիսա Ալավերդյանը:

Անդրադառնալով ԱԺ «Իմ քայլը» խմբակցության պատգամավոր Ռուբեն Ռուբինյանի հայտարարությանը` ՍԴ ճգնաժամի մասին, նախկին օմբուդսմենը նկատեց, որ ՍԴ ճգնաժամ չկա: «ՍԴ բոլոր այն որոշումները, որոնք ժամանակին ընդունել էին և ես համաձայն չէի կամ հասարակությունը համաձայն չէր, դա ճգնաժամ չէ»,- ասաց նա:

Թե ինչ նպատակով է ուզում իշխանությունը ՍԴ կազմի փոփոխություն անել, Լարիսա Ալավերդյանը չգիտի, բայց նրա խոսքով, ակնհայտ է, որ իշխանությունն ուզում է իրեն ենթարկվող դատական համակարգ ստեղծել:

Լարիսա Ալավերդյանը նկատում է, որ իմքայլականներն իրազեկված չլինելով, չունենալով պատշաճ գիտելիքներ այն ոլորտներում, որի մեջ իրենք մտնում են, բացարձակապես նշանակություն չտալով Հայաստանի գործող Սահմանադրությանը՝ հլու հնազանդ ենթարկվում են իրենց մատուցած օրինագծերի քննարկմանն ու հաստատմանը:

«Հիմա որտե՞ղ է ճգնաժամը: Համոզված եմ՝ օրենսդիր մարմինը գործադիր մարմնի ներքո, հենց այդ երկու մարմիններն են, որ ապրում են ճգնաժամ: Ճիշտ կլիներ, որ հանրության մեջ բոլոր նրանք, ովքեր հասկանում են, չեն սովորել հայհոյել, ովքեր հայերենի լեզվական շտեմարանը գիտեն՝ ինչպես օգտագործել, որ անհամաձայնությունն արտահայտեն հայերենով, դրանք են հարցը լուծողը: Մենք ավելի շատ ենք, քան կասկածելի մակիաժով, միայն հայհոյանքով հանդես եկող 50 անց կանայք: Դրանք չեն ժողովրդի ներկայացուցիչները»:

Լարիսա Ալավերդյանի կարծիքով՝ փորձ է արվում նսեմացնել Հայաստանը, հայությանը, Արցախը, և հանրության մեջ գիտակից խավի համար ճիշտ ժամանակ է ոչ թե պատասխանել, այլ մարտահրավեր նետել:

«Ինչքա՞ն կարելի է պասիվ դիրքերից խոսել: Բոլոր ունակ մարդիկ, ովքեր կարող են խոսքով, գրչով, այս կամ այն գործընթացով, համոզված ենք՝ պետք է այս դիմադրության շարժման նման մի հստակ դիրքորոշում հայտնեն»,- ասա Լարիսա Ալավերդյանը` հավելելով, որ իշխանության մեծ մասն «առաջին դեմքերով տեղում չէ»: