Էս կողմից են ուզում խլել, էն կողմից են ուզում խլել․ ո՞նց կխլեն հեղափոխությունը, հո «Մանուշակ» մանկապարտեզը չէ, մեծ մարդիկ ենք․ Մարուքյան

Թևան Պողոսյանին չի հաջողվել մերձեցնել «Լուսավոր Հայաստան» կուսակցության նախագահ Էդմոն Մարուքյանին ու Նիկոլ Փաշինյանին։ Այդ մասին լրագրողների հետ ճեպազրույցի ժամանակ ասաց Մարուքյանը՝ հիշեցնելով, որ «Մարդկային զարգացման միջազգային կենտրոնի» ղեկավար Թևան Պողոսյանն ասել է, թե պատրաստ է իր տանը հյուրընկալել և մերձեցնել:

«Որևէ սև կատու չի անցել մեր մեջ, որևէ անձնական խնդիր ես և Նիկոլ Փաշինյանը չունենք և չենք կարող ունենալ, մեր տարաձայնությունները միայն քաղաքական են»,-ասաց նա:

Մարուքյանը նկատում է, որ իշխանության և իրենց կուսակցության հարաբերությունները լավ չեն։ Նա նշում է նաև, որ այսօր իշխանությունն իր հետ չհամաձայնվող մարդկանց դիտարկում է որպես նախկին, սև ու ծախված: 

«Դուք նայեք մարդկանց որակը, սա է իրենց որակը, բնականաբար, բոլորին չի վերաբերում, այլ բոլոր նրանց, ովքեր լծված են «Լուսավոր Հայաստանի» դեմ հակաքարոզչությամբ: Իրենք իրենց կենսագրությունն են կասկածի տակ դնում, իրենց անցած ճանապարհը, իրենք իրենց են հարվածում»,- ասաց նա:

Էդմոն Մարուքյանը նկատում է, որ իրենց արձագանքը վիրավորանքներին ինքնանպատակ չէ։ Իհարկե, ոչ բոլոր գրառումներին են արձագանքում, սակայն ընդհանրապես լռելը նա ճիշտ չի համարում։

«Օրինակ` 50 բան են գրում, և իրենց 5 պատասխան ենք տալիս: Լավ այդ 5 պատասխանն էլ չտանք, կարանք դա էլ չտանք, բայց քաղաքականության մեջ ակնհայտ է, որ ինչ-որ բան են ասում ու դու պատասխան չես տալիս, հետո դրա հետ կապված ես խնդիր ունենում»,- ասաց նա:

Ինչ վերաբերում է Փաշինյանի կողմից արված հայտարարությանը, թե «հեղափոխությունը փորձում են խլել», ապա, Մարուքյանի դիտարկմամբ, հեղափոխությունը չի կարող ոչ ոք ոչ մեկից խլել, քանի որ այն մարդկանց սրտերում է։

«Այն, տեղի է ունեցել, արձանագրվել է, պատմական մեծամասնությունն է ձևավորել իշխանությունը: Անհնար է խլել այդ հեղափոխությունը և ով կասի, որ հեղափոխությունը խլում են, նա ստախոս է, ժողովրդին խաբում է: Հեղափոխության արդյունքում բացված պատուհանը պետք է օգտագործել բարեփոխումներ անելու համար և մարդկանց անդադար չենթարկել տեռորի, ասել՝ վա՜յ, վազելով եկեք այստեղ, խլում են, վա՜յ, վազելով հիմա եկեք այստեղ` էս կողմից են ուզում խլել, այդ ո՞վ կարող է ինչը խլել, ո՞նց կարող է խլել, հո «Մանուշակ» մանկապարտեզը չէ, մեծ մարդիկ ենք»,- ասաց նա:

Առաջիկա հանրաքվեի հետ կապված Մարուքյանը նոր բան չասաց, քանի որ համարում է, որ ամեն ինչ ասված է․ «մենք լսվել ենք»։