Իկրայի պատմությունը 100 տոկոսանոց ճշմարտություն է, դա եղել է․ Նարեկ Սամսոնյան (տեսանյութ)

«Քաղաքացիական գիտակցություն» ՀԿ նախագահ, «Անտիֆեյք» կայքի հիմնադիր Նարեկ Սամսոնյանը վստահեցնում է, որ սև իկրային հետ կապված պատմությունը մտացածին չէ, և նման բան իսկապես եղել է։ Այդ մասին նա հայտարարեց, «Մամուլի հետհեղափոխական մարտահրավերները» խորագրով քննարկման ժամանակ։

«Այդ գործը, որ իմ դեմ հարուցվել է, այլ հիմքեր ունի։ Ինձնից աղբյուր էին պահանջում, և քանի որ ստացան՝ հարուցեցին այս գործը»,- ասաց Նարեկ Սամսոնյանը՝ հավելելով, որ սա ատելության խոսքի մի մաս է և ատելության խոսքի հետևանք է։

«Աբսուրդային գործ է․ ցուցմունք չկա, բայց իրենք ցուցմունքի հիման վրա են հարուցել գործը ու շատ իրավաբաններ պարզապես ծիծաղում են»,- ասաց Սամսոնյանը:

Նա նկատում է, որ բոլոր հարցերը, որոնց իրենք անդրադարձել են, այդ թվում նաև իկռայի պատմությունը, հիմնավոր են եղել և հաշվի են առնվել մի շարք փաստեր։ 

«Իկռայի պատմությունը 100 տոկոսանոց ճշմարտություն է, դա եղել է»։

 «Անտիֆեյք»-ը նաև բացահայտել է Յութուբի այն ալիքները, որոնք ուղղակի ֆինանսավորվում են կառավարության հայտնի ՊՈԱԿ-ի կողմից, և մի պատգամավորի կողմից, որը հայտնի օլիգարխին հետ կապեր ունի, որոնք ատելության խոսք ենտարածում ի օգուտ Նիկոլ Փաշինյանի:

«Մենք այսօր գործ ունենք իշխանության կողմից խրախուսվող լրատվության մի տեսակի հետ, որը հերյուրանքներ, ատելության խոսք և զրպարտություն է տարածում: Եթե այսպես շարունակվի, առաջին տեղերում կլինեն հենց այդ յութուբյան ալիքները, որը նայում է հանրությունը»,- ասաց Նարեկ Սամսոնյանը:

Հիշեցնենք, որ Նարեկ Սամսոնյանը հայտարարել էր, որ Նիկոլ Փաշինյանը Երևանում գործող ռեստորաններից մեկից գնել է սև ձկնկիթ՝ մեկ կիլոգրամը 3.000 ԱՄՆ դոլար արժողությամբ, որից հետո՝ 2019 թվականի դեկտեմբերին, ՀՀ վարչապետի անվտանգության աշխատակիցներն այցելել են հիշյալ ռեստորան և ցանկացել են ձեռք բերել ևս մեկ կիլոգրամ սև ձկնկիթ՝ գումարը բանկային փոխանցման եղանակով վճարելու պայմանով, սակայն ռեստորանի տնօրինությունն անվտանգության աշխատակիցներին տեղեկացրել է, որ այդ դեպքում սև ձկնկիթի մեկ կիլոգրամը կարժենա 5.000 ԱՄՆ դոլար: Ըստ Նարեկ Սամսոնյանի` այդ մասին տեղեկանալուց հետո ՀՀ վարչապետը որոշել է ՀՀ պետական եկամուտների կոմիտեի միջոցով պատժել հիշյալ ռեստորանին:

Մանրամասները՝ տեսանյութում