«Դե լավ, է՜»․ Ալենը գոռաց զոհված տղերքի մայրերի վրա․ նրա շոուն չստացվեց (տեսանյութ)

Խաղաղ պայմաններում զոհված զինվորների ծնողները, կառավարության հերթական նիստի օրը, եկել էին պահանջելու հանդիպում վարչապետ Նիկոլ Փաշինյանի հետ։ 

Այս ծնողներն արդեն երկար տարիներ պայքարում են արդարության համար ու պահանջում բացահայտել իրենց որդիների սպանությունների գործերը, քանի որ նրանք ավելի քան վստահ են՝ իրենց որդիները ոչ թե ինքնասպանություն են գործել են, ինչպես ներկայացվում է, այլ նրանց սպանել են։ Մայրերը նկատում են, որ եթե անգամ զինվորներն ինքնասպանության են դիմել, ապա նրանց դրդել են դրան, մինչդեռ ոչ մի զինվորի ինքնասպանության գործով մեղավոր չի պատժվել։

Հեղափոխությունը նրանց մեջ հույս արթնացրեց, որ արդար դատավարություն կլինի և ամեն ինչ ջրի երես դուրս կգա, սակայն ոչ մի գործ, ոչ մի մասով չի տեղաշարժվել։ Կառավարության փետրվարի 20-ի նիստի օրն էլ, կառավարություն էր շտապում Ազգային ժողովի նախագահի տեղեկալ, իմքայլական Ալեն Սիմոնյանը, ով իբր որոշեց «լսել» ծնողներին։ 

Ավելի լավ էր՝ չաներ դա․ կողքից նայելիս, այնպիսի տպավորություն էր, որ նա այդ քայլին գնացել է «գալոչկա» դնելու, շոու սարքելու համար և ցույց տալու, թե իբր ավելի ժողովրդավար է, քան կառավարության ներսում այդ պահին նիստին մասնակցող մյուս պաշտոնյաներն ու բոլոր այն նախկինները, ում ժամանակ այս գործերը հանգուցալուծում չեն ստացել։ 

Մի քիչ ժպտալով, մի քիչ հեգնական հայացքով ու մի քիչ էլ հակադարձելով վրդովված որդեկորույս մայրերին՝ Սիմոնյանը նրանց լսեց ընդամենը 6 րոպե։

Մայրերն ասացին, որ իրենք արհամարհված են, քանի որ ոչ ոք իրենց չի լսում, ու իրենց որդիների սպանության գործի բացահայտման համար շահագրգռված չէ։

«Ձեզ հետ համաձայն չեմ»,- ասաց Սիմոնյանը՝ ժպտալով։

Վրդովված մայրերը մի քիչ բորբոքված ու, բնականաբար, բարձրացնելով տոնը, պահանջում էին, որ Սիմոնյանը փոխանցի վարչապետին, որ իրենք ուզում են հանդիպել նրա հետ։ Սիմոնյանն այս անգամ արձագանքեց․

«Վարչապետն ամեն ինչ գիտի»։

Ու երբ ծնողները նորից ասացին, որ իրենց ոչ ոք չի լսում, իրենց բոլորն արհամարհում են, իսկ վարչապետի օգնական Նաիրի Սարգսյանն էլ ընդհանրապես չի պատասխանում իրենց զանգերին՝ Ալեն Սիմոնյանը բորբոքվեց։ Նա սկսեց գոռալ զինվոր կորցրած մայրերի ու հայրերի վրա, իսկ հետո, արհամարհական ձեռքը թափ տալով, ասաց․ «լավ, է՜», ու հեռացավ՝ իր հերթին արհամարհելով ու հերթական անգամ ապացուցելով, որ բանակում տիրող վիճակի ու սպանությունների պատճառները հենց կոստյումով պաշտոնյաների արհամարհական ու անտարբեր վերաբերմունքն է։

Ո՛չ Փաշինյանը, ո՛չ Սիմոնյանը, ո՛չ էլ նախկին ու ներկայիս մյուս կոստյումավորները, երբեք չեն կարող հասկանալ, թե ինչ է ապրում սևազգեստ մայրը, երբ նրա տան ճրագը մարում է, երբ իր որդուն սպանողին քողարկում են, երբ իրեն չեն լսում, երբ չեն փորձում բացահայտել ու պատժել իրական մեղավորներին։

Ալեն Սիմոնյանին այդ պահին պարզապես «դիվիդենտներ էր» հարկավոր, քանի որ առջևում հանրաքվե կա, ու հարկավոր է սիրաշահել մարդկանց, որպեսզի ստանան իրենց բաղձալի «այո»-ները, հատկապես որ հրահանգ կա մանիպուլիացիայի ենթարկել մարդկանց։ Բայց ավելի լավ էր նման ցինիկ ժպիտով ու ինքնավստահ տեսքով չմոտենար, քանի որ ծնողները նորից զգացին, որ իրենց չեն լսում, իրենց հարցը պարզապես շահարկում են։ Ու այդ էր պատճառը, որ նրանք սկսեցին բորբոքվել ու վրդովմունքից ավելի բարձր տոնով խոսել։

Նրանց որդիները դասալիք չեն դարձել, ինչպես շատ պաշտոնյաներ կամ նրանց որդիներ են արել դա, բանակից չեն փախել, ծառայել ու զոհ են գնացել բանակում ստեղծված արատավոր վարք ու բարքին, ու այսօր արժանացել են արհամարհական ու անտարբեր վերաբերմունքի։

Ծնողներից մեկը շատ դիպուկ նկատեց․ «Մեր երեխաները հավի ճուտ չէին, որ սպանվեցին ու վերջ՝ կորան», բայց Ալենը միայն անտարբեր ժպիտով լսում էր․․․․

Դեռ երեկ, բանակի վիճակի համար պատասխանատու էին հանրապետականները, իսկ այսօր՝ Ալենն ու մյուս կոստյում-ժիլետավորները, ովքեր եկան, որ նախկիններին չհիշենք, եկան, որ ամեն ինչ ավելի լավ լինի, եկան, որ վերջ դրվի անարդարությանը․․․ բայց եկան, ու կրկնեցին նախկինների սխալները․․․

Այո՛, հենց Սիմոնյանն ու նրանից առաջ կոստյումավորներն են բանակում ստեղծել այդ բարձիթողի վիճակը, որն այսօր Փաշինյանը ներկայացնում է իբրև քաղաքացիական կյանքից բանակ ներխուժած քրեական ենթամշակույթ։

Մինչդեռ արատավոր ենթամշակույթն արդեն բույն է դրել իշխանական համակարգի արմատներում ու սկսել կրծելով չորացնել եղածը․․․

Արմինե Մկրտումյան