Կառավարությանը ձեռք չի՞ տալիս կարգավորել ձվի շուկան

Ընդհանուր թանկացումների ֆոնին՝ ձվի կտրուկ էժանացումը ոչ միայն չվրիպեց հասարակության աչքից, այլև մտավախություն ու կասկածամտություն առաջացրեց որոշների մոտ, թե հին ձուն են «սաղըցնում»։

Ու եթե շարքային գնորդներին անհանգստացնում է միայն ձվի թարմ և հին լինելու հարցը, ապա մանր ու միջին ձեռներեցները մտավախություն ունեն, որ խոշոր տնտեսվարող սուբյեկտները փորձում են իրենց՝ մանրերին, դուրս մղել դաշտից և, ձվի գնի էժանացմամբ, «իրենց գործին խփում են»։

Շուրջ մեկ ամիս քննարկվում է այն հարցը, թե ի վերջո ինչի՞ հաշվին է ձուն վաճառվում, այսպես ասած «ջրի գնով», բայց հարցի պատասխանը «չի գտնում» նույնիսկ Տնտեսական մրցակցության պաշտպանության պետական հանձնաժողովը (ՏՄՊՊՀ)։ Համենայնդեպս ՏՄՊՊՀ նախագահ Գեղամ Գևորգյանը հայտարարել է, թե շուկայում ուսումնասիրությունները դեռ շարունակվում են։ Նա այս մասին հայտարարեց նաև դեռ անցյալ ամսվա կեսին՝ փետրվարի 13-ի կառավարության նիստում․

«Եթե եղավ մեծ տնտեսվարողների կողմից վարած հակամրցակցային քաղաքականությունը, պատասխանատվության կենթարկեն ու շատ արագ, որ խնդիրը վերանա»։

ՏՄՊՊՀ նախագահի այս վճռականությունն այդ օրը, հավանաբար, այնքան էլ դուր չեկավ փոխվարչապետ Տիգրան Ավինյանին։ Նա «խուճապ» որակեց հանձնաժողովի նախագահի մտահոգությունը՝ կապված էժանացման հետ, ու ուղիղ հարց տվեց Գեղամ Գևորգյանին․ «Ինչպես է ստացվել, որ այս տարի Ամանորին ձվի հետ կապված խուճապային իրավիճակ չունեցանք»:

Թերևս պետք չէ գուշակություններ անել, թե այդ նիստից հետո ինչպես ծավալվեց խոսակցությունն Ավինյանի և Գևորգյանի միջև, փաստն այն է, որ այդ օրվա նիստի ժամանակ «գտնեմ-բերեմ-պատժեմ»-ի պատրաստակամությունը Գևորգյանի մոտ առաջվանը չէ։ 

Իհարկե, ՏՄՊՊՀ նախագահ Գեղամ Գևորգյանը շարունակում է ձվի այդչափ էժանացումը «աբսուրդ» որակել, բայց բավարարվում է միայն հայտարարությամբ։ Իսկ գործնականում ՏՄՊՊՀ-ն ուսումնասիում-ուսումնասիրում ու այդպես էլ դեռ չի «հասկանում», ու չի կարողանում պարզել, թե ով է իրական մեղավորը, որ ձուն վաճառվում է ինքնարժեքից ցածր գնով։

Այս օրերին Գևորգյանի «բացահայտող» հայտարարությունը եղել է այն, թե իբր ձվի շուկայում պրոֆիցիտը կապված է նրա հետ, որ վերջին 2 տարում հավերի անկում չի եղել․․․ չենք քննարկում։

Հնարավոր է շուկայում ունենք ավելցուկ, գերարտադրություն, մրցակցություն, ժամկետանց ձվերի խմբաքանակ․․․ ամեն դեպքում, ինչ էլ որ լինի, ձվի էժանացումից իրականում չպետք է ուրախանալ, քանի որ այն իրենից խնդիր է ներկայացնում, ու եթե իրավիճակը չկարգավորվի, ապա որոշ ընկերություններ ուղղակի սննկացման կգնան։

Այս ամենը հասկանալու և կանխելու համար կառավարության մասնագետներին շատ կարճ ժամանակ է հարկավոր, բայց քանի դեռ շուկան կարգավորված չէ, ապա կարելի է երազակացնել, որ այն վերահսկող կառույցներն այնքան էլ շահագրգռված չեն, որ խնդիրը լուծում ստանա, ու չի բացառվում, որ գուցև, ինչ-որ ձևով իրենց շահն ունեն այս բիզնեսից․․․ Չենք քննարկում նաև, թե ում մատը կարող է խառը լինե այս հարցում, դրա ձայնը թերևս դեռ կլսենք, սակայն մասնագետ պետք չէ լինել հասկանալու համար, որ դաշտում կան մի քանի խաղացողներ, քանի որ միայն մեկ արտադրող չէր կարող գնային քաղաքականության վրա նման ազդեցություն ունենալ, այն էլ՝ առանց «հովանավորի»․․․ 

Ի միջի այլոց, Գեղամ Գևորգյանին 2018 թվականին գյուղնախարար նշանակելու համար, ըստ օդից կախված լուրերի, միջնորդել է Տիգրան Ավինյանը, ով, դարձյալ նույն տեղեկության համաձայն, շահագրգռված է եղել նաև նրան տեսնել ՏՄՊՊՀ նախագահի պաշտոնում։

NEWSPRESS.am