Մանվել Գրիգորյան եղբորորդու կողմից սպանվածի որդին վերադարձել է «նոր» Հայաստան, որտեղ նրան ծեծի են ենթարկել (տեսանյութ)

Էդուարդ Պողոսյանն ապրում է Կալինինգրադում, ուր ընտանիքով տեղափոխվել է հոր սպանությունից հետո։ Նա, հավատալով հեղափոխուիթյանը, հայտարարել է, որ իր հորը՝ Մհեր Պողոսյանին, սպանել է գեներալ Մանվել Գրիգորյանի եղբորորդին՝ Հրանտ Գրիգորյանը: Այդ մասին առաջին անգամ Էդուարդ Պողոսյանը բարձրաձայնել է 2018 թվականի հունիսին՝ NEWSPRESS.am-ի հետ զրույցում։

Նա մանրամասն ներկայացրել է, թե ինչ է տեղի ունեցել, ովքեր են ականատեսները, ինչպես են սպանել իր հորն ու, թե ինչու է իր ընտանիքը դրանից հետո լքել Հայաստանը:

Մհեր Պողոսյանի որդին՝ Էդուարդը, մեզ հետ զրույցում պատմել էր, որ իր հայրը փորձել է պաշտպանել այդ տարիներին Էջմիածնի էլեկտրական ցանցի տնօրեն՝ «Ֆալչի Նորիկ» մականվամբ Նորիկ Կարապետյանին: Վերջինս, բացառիկ հարցազրույցով, մեզ մանրամասներ է պատմել միջադեպից:

NEWSPRESS.am-ն այս միջադեպին անդրադարձել է նաև մեկ այլ ականատեսի վկայությամբ:

Ու քանի որ իշխանափոխությունը ոգևորել է Էդուարդ Պողոսյանին, ուստի նա որոշել է ոչ միայն խոսել կատարվածի մասին, այլև արդարությունը վերականգնելու, հոր սպանողին պատժելու համար վերադարձել էր Հայաստան, սակայն կարճ ժամանակ անց, Էդուարդ Պողոսյանը դարձյալ լքել է հայրենիքը՝ առանց որևէ մեկնաբանության: Միայն այսօր նա հրապարակել է տեսանյութ և խոստովանել, որ իր նկատմամբ մահափորձ է իրակականացվել, ինչի հետևանքով էլ նա հեռացել է:

Տեսանյութում տեղի ունեցած միջադեպը նկարահանվել է 2019 թվականի նոյեմբերի 23-ին։ Տեսանյությում երևում է, թե ինչպես են փակ դեմքով և մահակներով զինված 2 անձ հետապնդում նրան։ Այս դեպքից հետո Էդուարդ Պողոսյանը մեկնել է Հայաստանից։

«Ես չէի ուզում հրապարակել այս ձայնագրությունը մի շարք պատճառներով, բայց իրավիճակը շատ հեռուն է գնացել։ Երբ ես Հայաստանում էի, ինձ վրա ուշ երեկոյան հարձակվեցին դիմակավորված 2 անձ՝ հնչեցնելով հետևյալ արտահայտությունը՝ «Դու ոնց որ չես ուզում խելոք նստես տեղդ»։ Նրանք զինված էին մահակներով։ Նրանցից մեկի մոտ դանակ նկատեցի, բայց ինձ հաջողվեց փախչել մի քանի հարվածներից հետո։ Ես արդեն ենթադրում եմ՝ ով և ինչու է սա կազմակերպել»,- գրել է Էդուարդ Պողոսյանը: