Վանաձորի քաղաքապետը կառչում է փրփուրներից (տեսանյութ)

Վանաձորում անցկացվում է մրցույթ՝ ներքաղաքային միկրոավտոբուսային երթուղների սպասարկման իրավունքի հատկացման համար: Քաղաքն սպասարկող 19 երթուղիներից 7-ի համար հայտ է ներկայացրել միևնույն՝ «Ռ և Տրանս ՍՊԸ»-ն: Ընդ որում այս ցուցակում ներառված թիվ 1 երթուղին արդեն 10 տարի սպասարկել է Վանաձորի քաղաքապետի ազգական Վիկտոր Դարբինյանին պատկանող՝ «Դիկտիս ՍՊԸ»-ը:

Newspress.am-ի հետ զրույցում Վիկտոր Դարբինյանը չթաքցրեց, որ քաղաքապետը երթուղին իր ձեռքից վերցնելու փորձեր է արել: Նրա խոսքով՝ Սամվել Դարբինյանի «դրածոները» դեռ ամիսներ առաջ խնդիրը փորձել են լուծել խաղաղ բանակցությունների միջոցով, սակայն բացասական պատասխան ստանալով՝ սկսել են սպառնալ:

«Նրանք փոձում են իմ ձեռքից վերցնել առաջին գիծը: Սկզբում գործնական առաջարկներ են արել՝ երթուղին ինքնակամ հանձնելու ակնկալիքով, հետո ասացին, եթե լավ ձևով չհանձնեմ, ապա իմ ամբողջ բիզնեսը ձեռքիցս կվերցնեն: Ասել են՝ նենց կանենք, որ մրցույթը չանցնես, իսկ եթե չստացվի՝ մրցույթը չեղյալ կհայտարարենք»,- ասաց Վիկտոր Դարբինյանը:

Նա մանրամասնեց, որ «Ռ և Տրանս ՍՊԸ»-ն փաստացի գրանցաված է Յուրի Համբարյանի անունով, ով հանդիսանում է քաղաքապետի դատավոր որդու` Աղասի Դարբինյանի մանկության ընկերն ու նաև սանիկը: Իսկ իրականում այս ընկերությունը պատկանում է հենց քաղաքապետին ու նրա որդուն: Այնպես, որ Դարբինյանների ընտանիքը պայքարում է ոչ թե իր սանիկի, այլ հենց իր ունեցվածքի համար: Ու որքան էլ քաղաքի ընտրողների մեծ մասը քաղաքապետի բարեկամները լինեն, վերջինս, այնուամենյնիվ, վստահ չէ, որ կարող է վերընտրվել ու փորձում է «զավթել» վերջին յուղոտ պատառները:

Ի դեպ երթուղու մրցույթի առաջին փուլն արդեն ավարտվել է: Հայտեր ներկայացնող ընկերությունների համար ստղծվել են անհավասար պայմաններ: Իսկ հանձնաժողովի նախագահ Սամվել Դարբինյանը ընդհանրապես չի մասնակցել մրցույթին: