Շատերը Ֆեյսբուքում կարծիք չեն հայտնում, որովհետև ներվեր չունեն, որ իրենց վրա հայհոյանքներով հարձակվեն․ Էդմոն Մարուքյան

Ամեն օր փողոցներում ենք, շփվում ենք մարդկանց հետ, և մեզ հայհոյող չի եղել: Այս մասին ԱԺ ճեպազրույցի ժամանակ հայտարարեց «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով «Իմ քայլը» խմբակցության պատգամավոր Սիսակ Գաբրիելյանի այն հայտարարությանը, թե այս երկրում ոչ միայն ֆեյքերն են իրենց հայհոյում կամ չեն սիրում, այլ նաև իրական քաղաքացիները:

ԼՀԿ խմբակցության պատգամավոր Մանե Թանդիլյանն էլ նկատեց, որ իշխանությունը փորձում է արդարացնել այն մթնոլորտը, որ հաճախ ստեղծվում է նաև նրանց մասնակցությամբ: Թանդիլյանը շփվում է տարբեր մարդկանց հետ և նկատել է՝ մարդիկ հաճախ ֆեյսբուքում որևէ կարծիք չեն հայտնում, որպեսզի լուտանք չթափվի իրենց գլխին։

«Կարծում եմ՝ նման զրույցներից առաջ լավ կլինի մեր իշախանական գործընկերները մտածեն, թե ինչ մթնոլորտ է տիրում երկրում և ինչպես է մեզ մոտ այլակարծությունը, տարբերվող կարծիքը ոչնչացվում, քարկոծվում, ջախջախվում, անհնար, անընդունելի ձևաչափերով»,- ասաց նա:

Էդմոն Մարուքյանի դիտարկմամբ էլ այլընտրանքային լուծումներ առաջարկող խոսքն, այնքան է քննադատված, որ մարդիկ չեն արտահայտվում այլևս:

«Եթե նայեք ֆեյսբուքյան տիրույթը, տպավորություն է, որ միայն իշխանությունն ունի աջակիցներ, բայց բնավ այդպես չէ, ուղղակի մյուսները լուռ կարդում են ու անում հետևություններ, որովհետև ներվեր չունեն, որ իրենց վրա մի 200 հոգի հարձակվի, ամենավերջին սեռական հայհոյանքներն իրենց տա. այդ մարդկանց հոգեկանն ուղղակի խանգարվում է, մարդիկ չեն կարողանում օր ու արև ունենալ դրա պատճառով»,- ասաց նա։