Գրում եմ որպես մարդ, որը տեսել է երկրաշարժը, ժողովրդական զարթոնքը, պատերազմը, ԱԺ գրավումը, հոկտեմբերի 27-ը, մարտի 1-ը, ապրիլյան պատերազմը. Կարեն Քոչարյան

Գրում եմ որպես մարդ, որը տեսել է 88թ երկրաշարժը, 88-90թթ ժողովրդական զարթոնքը, 92-94թթ պատերազմը, 96թ Աժ գրավումը, 99թ հոկտեմբերի 27-ը, 2008թ մարտի 1-ը և վերջապես 2016թ ապրիլյան պատերազմը (էս ինչ հին եմ ես փաստորեն): Այդ մասին ֆեյսբուքյան իր էջում գրել է քաղտեխնոլոգ Կարեն Քոչարյանը։

«Վերջին օրերին անընդհատ խոսվում է տարբեր վճարումները (բանկային տոկոսներ, վարկեր, կենցաղային վճարումներ և այլն) հետաձգելու մասին: Իմ շատ սիրելի հայրենակիցներ, ես հասկանում եմ, որ կլինեն մարդիկ, ովքեր իրոք ծանր ֆինանսական վիճակի մեջ են:

Բայց, ինչպես արդեն նշեցի, որպես մարդ, որը շատ բան է տեսել, ասեմ, որ կոռոնովիրուսից հետո հաստատ կյանքը շարունակվելու է: Այս պահին ամենակարևորն, անկասկած, մարդկանց առողջությունն է:

Բայց, երբ այս մղձավանջ ավարտվի (իսկ դա, համոզված եմ, շատ ուշ չի լինի) մենք պետք է կարողանանք վերադառնալ բնականոն կյանքի: Եվ ինչքան քիչ վնասված լինի տնտեսությունը, այնքան ավելի արագ կվերադառնանք այդ ռեժիմին: Հիմա պատկերացրեք, որ ոչ ոք չվճարի հոսանքի, գազի, ինտերնետի համար կամ բանկի գումարները: Որտեղից պետք է պետությունը( որին այդ տնտեսվարողները պետք է հարկեր վճարեն) վճարի մեր թոշակառուների թոշակները կամ բյուջետային աշխատողների աշխատավարձերը: Փառք Աստծո, օրերը երկարել են և տաքացել, ինչը զգալի կկրճատի հոսանքի և գազի ծախսը: Իսկ ինտերնետ պրովայդերներին հատուկ շնորհակալություն եմ ուզում հայտնել(ինչպես և հեղափոխության օրերին) հստակ և անխափան աշխատանքի համար:

Համոզված եմ, որ բոլոր այս կազմակերպությունները ճկուն կգտնվեն սոցիալապես առավել խոցելի խմբերի հանդեպ: Իսկ մնացածը պետք է հասկանան, որ սա այն դեպքն է, որ կամ միասին պետք է դուրս գանք այս իրավիճակից, կամ միասին կխորտակվենք, արդեն ոչ թե կորոնավիրուսից, այլ հետվիրուսային տնտեսական կոլափսից: Այնպես, որ մի ճնշեք տնտեսվարողներին... բացառությամբ նրանց, ովքեր այս իրավիճակում փորձում են գերշահութներ ստանալ և անհիմն բարձրացնում են գները: