Ինչից դրդված Քոչարյան Անդրանիկը որոշեց Սերժ Սարգսյանին հրավեր ուղարկել

Անդրանիկ Քոչարյանի գլխավորությամբ գործող Ազգային ժողովի Ապրիլյան պատերազմի քննիչ հանձնաժողովը 3-րդ նախագահ Սերժ Սարգսյանին հրավիրել է հանձնաժողով:

Քոչարյանն ու այդ հանձնաժողովի պատգամավորները Սերժ Սարգսյանին պետք է հարցեր տան Ապրիլյան պատերազմի մասին, փորձեն հասկանալ, թե ով՝ ինչ հրահանգ է ստացել, և ով՝ ինչպես է գործել այդ օրերին:

Մի կողմ թողնենք այն, որ Անդրանիկ Քոչարյանը որոշել է Սերժ Սարգսյանին հանձնաժողով հրավիրել այն ժամանակ, երբ հեռուստաընկերություններից մեկով եթեր հեռարձակվեց այդ պատերազմի մասին պատմող մի փաստավավերագրական ֆիլմ, որը ոչնչնացրեց մինչ այժմ պատերազմի տարբեր հանգամանքներ զանազան քաղաքական շահերով շահարկելու նախկին ընդդիմադիրների և ներկայիս իշանավորների բոլոր թեզերը:

Այդ ֆիլմը դարձավ պատճառ, որ մարդիկ ևս մեկ անգամ հիշեն չգիտես ինչու իր գոյությունը քարշ տվող մի հանձնաժողովի մասին և քննադատեն ոչինչ չանելու համար:

Հիմա այդ քննադատությունը մեղմելու նպատակով Քոչարյան Անդոն որոշել է ոչ ավել ոչ պակաս հանձնաժողով հրավիրել Սերժ Սարգսյանին:

Տարօրինակն այստեղ այն է, որ նույն ջանասիրությամբ Քոչարյանը հանձնաժողով դեռ չի հրավիրել այդ հանձնաժողովի ստեղծման գլխավոր պատճառի մասին գոռացող Նիկոլ Փաշինյանին:

Եթե ընդդիամդիր պատգամավոր Նիկոլ Փաշինյանը հայտարարում էր, որ Ապրիլյան պատերազմը պայմանավորված էր Ռուսաստանի հետ, ապա հարց է առաջանում, իսկ ինչո՞ւ մինչև հիմա նա չի եկել հանձնաժողով ու հանձնաժողովականներին լուսավորել պայմանավորվածությունների մանրամասների մասին իր տեղեկություններով:

Անդրանիկ Քոչարյանը Նիկոլ Փաշինյանին դեռ չի տվել հարցը, իսկ այս պայմանավորվածության մասին արդեն վարչապետ Փաշինյանը դուխով հայտնե՞լ է Վլադիմիր Պուտինին, և ի՞նչ պատասխան է ստացել նրանից:

Եթե 2016 թ. պատերազմի պայմանավորված լինելու հանգամանքը այս հանձնաժողովը չի բացահայտում, բա ի՞նչ է անում այդ դեպքում այսքան ժամանակ, և ո՞րն է այդ հանձնաժողովի գոյության նպատակը: Էժանահգին շոուներով հանրության մոտ գործ անողի տպավորություն ստեղծելն այլևս չի աշխատում. այլ բան է պետք մտածել:

NewsPress.am