Արտակարգ դրության պայմաններում «Արաքս թռչնաֆաբրիկա» ՓԲԸ-ն շարունակում է իր գործունեությունը՝ պահպանելով սահմանված կանոնները

Կորոնավիրուսով պայմանավորված Հայաստանում և հարևան երկրներից շատերում հայտարարված արտակարգ դրությունը շարունակվում է: Սահմանված սահմանափակումները բազմաթիվ խնդիրների պատճառ են դարձել արտադրող ընկերությունների համար, որոնցից մեկը «Արաքս թռչնաֆաբրիկա» ՓԲԸ-ն է:
Ընկերությունը, որն արտադրում է հավի միս և սեղանի ձու, խնդիրներ է ունեցել թռչնի մայրական հոտի ներկրման հետ կապված:Ստեղծված իրավիճակի և խնդրի լուծման տարբերակների մասին զրուցել ենք «Արաքս թռչնաֆաբրիկա» ՓԲԸ-ի գլխավոր տնօրեն Մուշեղ Հակոբյանի հետ։

-Օրեր առաջ Հունգարիայի Հանրապետությունից մեծ քանակի բրոյլեր թռչնի մայրական հոտ եք ներկրել։Խմբաքանակը ներկրել եք Վրաստանի միջոցով ու խնդիրներ են առաջացել ստեղծված կորոնավիրուսային համաճարակի պատճառով։ Մասնավորապես՝ Թբիլիսիում արգելվել է տեղաշարժը, ինչը խանգարել է խմբաքանակի տեղափոխմանը։ Կներկայացնեք ինչպե՞ս եք իրավիճակից դուրս եկել։

-Հունգարիայից պետք է մայրական հոտի ճտեր բերեինք Հայաստան, բայց կորոնավիրուսի հետ կապված խնդիրներ էին առաջացել։

Հունգարիայից տեղափոխել էինք օդային ճանապարհով Վրաստան, իսկ այնտեղից Հայաստան բեռնատարներով պետք է տեղափոխվեր։Վրաստանում պարետային ժամ կար՝ 21:00-ից մինչև առավոտյան 6: 00-ն և մենք չէինք կարողանում իրականացնել փոխադրումը։ Դիմեցինք ՀՀ վարչապետի աշխատակազմին միջնորդելու համար, որպեսզի կարողանանք փոխադրել, և մեկ օրում ստացանք անհրաժեշտ աջակցությունը: Վարչապետի աշխատակազմը դիմել էր Վրաստանի վարչապետի աշխատակազմին և ստացել անհրաժեշտ թույլտվությունը։ Ընկերությունը շնորհակալություն է հայտնում վարչապետի աշխատակազմին արագարձագանքման և աջակցության համար:

-Ի՞նչ քանակի մայրական հոտի մասին է խոսքը և արտադրանքը որակական ի՞նչ հատկանիշներ ունի։

-Քանակի մասին չբարձրաձայնեմ, դա նաև կոմերցիոն գաղտնիքն է, սակայն կարող եմ ասել, որ բավականին ժամանակ սպառողին կապահովենք թարմ ու որակյալ հավի մսով: Ընկերությունը մշտապես աշխատում է ավելացնել արտադրության ծավալները՝ ընդլայնելով առաջարկվող արտադրանքի տեսականին։

-Ո՞րն է Ձեր թռչնաֆաբրիկայի հաջողության գրավականը:

-Ընկերության հաջողության գրավականը թռչնաբուծարանի ժամանակակից սարքավորումներն ու վերամշակող լավագույն տեխնոլոգիաներն են, ինչպես նաև,կեր արտադրող սեփական գործարանն ու լաբորատորիան:

-Էլ ի՞նչ աշխատանքներ կամ ծրագրեր կան, որոնք տուժել են Արտակարգ դրությունով պայմանավորված:

-Այս պահին ընթանում է նաև Հայաստանում առաջինն ու միակն իր տեսակի մեջ ինկուբատորային գերժամանակակից արտադրամասի կառուցումը, որը նախատեսված է ածան հավերի մեկ օրեկան ճուտ ստանալու համար: Իր հզորությամբ կարող է ապահովել ՀՀ-ում պահանջվող ճտերի պահանջարկն ամբողջությամբ:
Շինարարության ավարտը նախատեսվում է մայիս ամսվա վերջում կապված վիրուսների հետ: Մենք ամեն բան անում ենք, որ ստեղծված իրավիճակում ձգձգումներ չլինեն՝ միաժամանակ պահպանելով սահմանված կարգուկանոնը:

-Քանի՞ աշխատատեղ կապահովի արտադրամասը:

-Ստեղծվելու է 50-60 աշխատատեղ:

-Կորոնավիրուսի վարակի տարածման հետ կապած շատ աշխատատեղեր փակվել են, որոշ գործատուներ էլ կրճատել են աշխատակիցների քանակը։ Ձեզ մոտ ինչպիսի՞ն է իրավիճակը։

- Աշխատակիցների հետ կապված մեզ մոտ փոփոխություն չի եղել։ Որոշ աշխատակիցների աշխատանքները կազմակերպվել է հեռահար,կատարել ենք որոշակի փոփոխություններ աշխատանքների կազմակերպման առումով: Հնարավորինս սահմանափակել ենք շփումները:Մենք աշխատում ենք նույն ռեժիմով և պատրաստ ենք Զատկի տոնին ընդառաջ ապահովել ՀՀ բնակչությանը հավկիթով:

- Իսկ ի՞նչ քայլեր եք ձեռնարկել աշխատակիցների տեղափոխման և վիրուսով վարակումից զերծ պահելու համար։

- Մենք սննդի արտադրության ոլորտում ենք աշխատում, և անկախ նոր տեսակի վիրուսի տարածումից, մենք միշտ կատարել են ախտահանման աշխատանքներ: Աշխատակիցների տեխափոխումն իրականացնում ենք ավտոբուսներով, որոնք ամեն օր ախտահանվում են՝ օրը երկու անգամ,և պարտադիր մինչև տարածք մուտք գործելը աշխատակիցները ջերմաչափվում են: Մեկ անգամ էլ օրվա ընթացքում ենք իրականացնում ջերմաչափում: Աշխատակիցներին տրամադրում ենք ձեռնոցներ ու դիմակներ, որոնք օրվա ընթացքում փոխվում են մի քանի անգամ։